БҰҰ-ның 4 – Тұрақты даму мақсаты – «Сапалы білім беру» аясында 2026 жылғы 17 наурыз күні сағат 13:00-де «Халықаралық логистика» (магистратура) қосдиплом білім беру бағдарламасының (ББ) онлайн-презентациясының халықаралық семинары өтті

Әл-Фараби атындағы Қазақ ұлттық университетінде Патрис Лумумба атындағы Ресей халықтар достығы университетімен (РХДУ) (https://www.rudn.ru/) қос диплом бағдарламасы аясында жүзеге асырылатын «Халықаралық логистика» білім беру бағдарламасының таныстырылымына арналған ақпараттық кездесу өтті. Іс-шара студенттерді бағдарламаның ерекшеліктерімен, оның академиялық артықшылықтарымен, халықаралық білім алу мүмкіндіктерімен және түлектердің кәсіби даму перспективаларымен таныстыру мақсатында ұйымдастырылды.

Кездесуге қатысушыларға құттықтау сөзін РХДУ Экономика факультетінің деканы, «Халықаралық экономикалық қатынастар» кафедрасының меңгерушісі, экономика ғылымдарының докторы, профессор – Андронова Инна Витальевна арнады. Ол өз сөзінде халықаралық логистиканың дамуы жаһандық жеткізу тізбектерін тиімді басқаруға, көлік-логистикалық үдерістерді оңтайландыруға және әлемдік экономиканың жаһандану жағдайында халықаралық тауар ағындарының тұрақтылығын қамтамасыз етуге қабілетті мамандарды даярлаудың негізгі бағыттарының бірі екенін атап өтті. Оның айтуынша, қазіргі экономика жаһандық нарықтар, цифрлық технологиялар, жеткізу тізбектерін басқару және халықаралық сауда салаларында білімі бар жаңа буын мамандарын талап етеді.

Студенттердің ерекше қызығушылығын РХДУ Экономика факультетінің халықаралық байланыстар жөніндегі декан орынбасары – Соколан Дарья Сергеевна таныстырған баяндама тудырды. Ол білім беру бағдарламасының құрылымын жан-жақты таныстырып, қос диплом бағдарламасының артықшылықтары, гранттық орындар саны, шәкіртақы мөлшері және академиялық ұтқырлық мүмкіндіктері туралы баяндады. Презентация барысында бағдарлама логистикалық компанияларда, көлік-экспедиторлық ұйымдарда, халықаралық корпорацияларда, сондай-ақ сыртқы экономикалық қызмет пен халықаралық тасымалдарды ұйымдастырумен айналысатын құрылымдарда жұмыс істей алатын мамандарды даярлауға бағытталғаны атап өтілді.

Оқытудың практикалық бағыттылығына ерекше назар аударылды. Бағдарлама студенттері заманауи логистикалық технологияларды, жеткізу тізбектерін басқару әдістерін (supply chain management), халықаралық көлік жүйелерін, кедендік реттеуді, цифрлық логистиканы және аналитикалық құралдарды меңгеруге мүмкіндік алады. Сонымен қатар, ғылыми-зерттеу жобаларына, тағылымдамаларға және халықаралық білім беру бастамаларына қатысу қарастырылған.

Әл-Фараби атындағы ҚазҰУ-ға түсу шарттары, оқу үдерісінің ерекшеліктері және академиялық даму мүмкіндіктері туралы аталмыш бағдарламаның үйлестірушісі, аға оқытушы – Шуренов Нурсултан Бекетович баяндады. Ол өз сөзінде талапкерлерге қойылатын талаптар, құжаттарды тапсыру тәртібі, конкурстық іріктеу ерекшеліктері туралы жан-жақты түсіндіріп, университетте білім алудың артықшылықтарына тоқталды. Атап айтқанда, жоғары деңгейдегі академиялық дайындық, студенттердің ғылыми зерттеулерге қатысуы және халықаралық алмасу бағдарламаларына қатысу мүмкіндіктері атап өтілді.

Кездесу барысында студенттер бағдарламаға жоғары қызығушылық танытып, білім беру мазмұны, тағылымдамадан өту мүмкіндіктері, халықаралық жобаларға қатысу және болашақ мансаптық перспективаларға қатысты сұрақтар қойды. Аталған іс-шара студенттерді «Халықаралық логистика» білім беру бағдарламасының мүмкіндіктерімен таныстыруда және университеттер арасындағы академиялық ынтымақтастықты нығайтуда маңызды алаң болды.

Іс-шараны ұйымдастырушылар: Әл-Фараби атындағы ҚазҰУ «Бизнес-технологиялар» кафедрасының меңгерушісі Ахметова З.Б. және «Халықаралық логистика» білім беру бағдарламасының үйлестірушісі, аға оқытушы Н.Б. Шуренов. Ақпараттық кездесу халықаралық білім беру бағдарламаларын ілгерілетуде және Қазақстан мен Ресейдің жетекші университеттері арасындағы академиялық серіктестікті дамытуда маңызды қадам болды.