Әл-Фараби атындағы ҚазҰУ ғалымдары мен БҰҰ, ЮНЕСКО өкілдерінің бірлескен мәжілісінде университет ректоры Ғалымқайыр Мұтанов ЮНЕСКО-ның бас директоры Ирина Бокованың қолы қойылған, университетте тұрақты даму бойынша ЮНЕСКО халықаралық кафедрасының ашылуын ресми түрде растайтын құжатты салтанатты түрде ресімдеді. Іс-шарада Қазақстан, Қырғызстан, Тәжікстан және Өзбекстан бойынша ЮНЕСКО кластер бюросының Алматыдағы директоры Андрей Шевелев жаңа ЮНЕСКО кафедрасының сапалы білім беру, гендерлік теңдік, лайықты жұмыс пен экономикалық даму, тұрақты қалалар, климат өзгерісімен күрес, экожүйелердің сақталуы, бірлік пен ынтымақтастықты алға тарту сынды тұрақты даму мақсаттарына жетуде маңызды рөл атқаратынын атап өтті. Сондай-ақ, Қазақстан комиссиясының ЮНЕСКО және ИСЕКО жұмыстары бойынша бас хатшысы Әсел Өтегенова университеттің тұрақты даму шешіміне қосқан үлесін атап өтсе, Ирина Бокова ханым: «Тұрақты даму бойынша мақсаттарды табысты іске асыру тек көшбасшылардың мойнындағы жұмыс емес, ең алдымен азаматтық қоғамның жұмысы» екендігін атап көрсетті. БҰҰ-ның Алматы бойынша қоғамдық ақпарат департаментінің директоры Властимил Самек университетті аталмыш кафедраның ашылуымен құттықтай отырып, бұл қадамның жастардың мүмкіндіктерін арттырып, әлеуметтік инновациялар мен өзгерістерге, әлемдік мәдениеттің қалыптасуына өз септігін тигізетініне сенім білдірді. Гүлзейнеп СӘДІРҚЫЗЫ, «Егемен Қазақстан» Университет ректоры аталмыш кафедра демократиялық құндылықтар, соның ішінде, толеранттылық, плюрализм, адам құқығын құрметтеу, бостандық ұғымдары алға қойылатын пікірталас алаңы болатынын растады. ЮНЕСКО кафедрасы қызметі шеңберіндегі жобаларды іске асыру тұрақты даму айналасында мемлекет пен аудан әлеуетін арттыруға қолдау көрсету бағытындағы бастамаларға жаңа серпін болары анық.
АЛМАТЫ
Басқа жаңалықтар
