"Айқын" республикалық қоғамдық-саяси күнделікті газет

17.01.2013

Бұл жерде көңілге қонымдысы – «Бо­лашақ» бағдарламасына үміткер та­лапкерлерді іріктеу жүйесінің ха­лықаралық талаптарға сай жүргізілуі. Сон­дықтан әрбір ұжым, мекеме талапты да талантты жастарына үміт артып, қолдау көрсетіп, жолдамалар беруде. Осындай жолдама негізінде, мен де әл-Фараби атындағы ҚазҰУ шығыстану факультетінің ұжымы атынан өз бағымды сынап, бәйгеге қатыстым. Байқау барысында басқа да үміткерлер сияқты IELTS – халықаралық ағылшын тілінің тест жүйесі, мемлекеттік тіл, интеллек­туал­ды-психологиялық тест тапсырып, Тәуелсіз эксперттік комиссия (ТЭК) талқысына түсіп, «Болашақ» стипендиаты атандым. «Болашақ» бағдарламасының үміткерлері үшін ең қуанышты сәт – ТЭК қорытындысының оң шешімі. Әрине, бұл емтихандардың ҰБТ, ма­гистратура және докторантураға қабылдау емти­хан­дарынан талабы да, талғамы да, құ­рылымы да өзгеше. Енді, міне, сәтін салса, Ұлыбри­та­ния­ның Рединг университетінде ғылыми тәжірибеден өтпекшімін. Жетекші жоғары оқу орнында алынатын дағды мен білімді әл-Фараби атындағы ҚазҰУ-да қолданарым сөзсіз.

Анар МҰСТАФАЕВА,
«Болашақ» стипендиясының иегері,
әл-Фараби атындағы ҚазҰУ-дың шығыстану факультеті,
Арабтану және ирантану кафедрасының доценті