ҚазҰУ-да PR-білім берудің өзекті мәселелері талқыланды
Әл-Фараби атындағы Қазақ ұлттық университетінде ҚР қоғаммен байланыс жөніндегі Ұлттық қауымдастығымен, сондай-ақ "PR-шы" кәсіби клубымен бірлесіп ұйымдастырылған "Нарықтағы 15 жыл: ҚР-дағы PR-білім берудің өзекті мәселелері" атты мерейтойлық ғылыми-әдістемелік конференция өтті.
Қазақстандық баспасөз клубының президенті, қоғаммен байланыс жөніндегі ұлттық қауымдастық кеңесінің төрағасы Әсел Қараулова құттықтау сөз сөйледі. "Бұл мерейтой қол жеткізілген жетістіктерді қайта қарастыруға және қазір біздің алдымызда қандай қиындықтар тұрғаны туралы ойлануға себеп болды. Осыған байланысты Әл-Фараби атындағы ҚазҰУ ректоры, профессор Жансейіт Қансейітұлы Түймебаев 2009 жылы ҚР Білім және Ғылым министрі болған кезде PR мамандығының жандануына ықпал еткенін ерекше атап өткен жөн", - деп атап өтті Әсел Қараулова.
Конференцияда Әл-Фараби атындағы ҚазҰУ мен кәсіби қоғамдастық арасында нарық қажеттіліктеріне сәйкес оқыту бағдарламаларын жақсарту, білім беру бағдарламаларының мазмұнын жаңарту және жетілдіру, оқытушылар мен студенттердің біліктілігін бірлесіп арттыру, тренингтер мен семинарлар өткізу саласындағы ғылыми-әдістемелік қызметті көздейтін ынтымақтастық туралы шартқа қол қойылды.
PR-білім беруді дамытудағы баға жетпес еңбегі үшін Қазақстандық баспасөз клубының президенті, қоғаммен байланыс жөніндегі ұлттық қауымдастық кеңесінің төрағасы Әсел Қараулова "Ерен еңбегі үшін" медалімен марапатталды.
Конференция барысында білім беру және қоғаммен байланыс жөніндегі мамандарды даярлау саласындағы заманауи үрдістер мен сын-тегеуріндерге егжей-тегжейлі талдау жүргізілді, кәсіби қоғамдастықпен өзара іс-қимыл мәселелері, атап айтқанда, оқытудың өзектілігі мен практикалық бағытын қамтамасыз ету үшін білім беру мекемелері мен практик мамандар арасында тиімді диалог құру және қолдау мәселелері қаралды.
Сондай-ақ, қазіргі заман үшін PR-білім берудегі этика мен әлеуметтік жауапкершілік тақырыбы көтерілді, өйткені студенттерде кәсіби қызметтің жоғары моральдық стандарттарын қалыптастыру өте маңызды.
Конференция жұмысының қорытындысы бойынша қатысушылар ғылыми-әдістемелік жұмысты жақсартуға бағытталған ұсыныстар мен ұсынымдар ұсынды. Атап айтқанда, білім беру бағдарламаларын әзірлеу кезінде ұлттық біліктілік шеңберін, Қазақстанның жаңа кәсіптер мен құзыреттер атласын, Дублин дескрипторларын және Еуропалық біліктілік шеңберін ескеру ұсынылды. Алматы қаласының және басқа қалалардың жоғары оқу орындарына "Қоғаммен байланыс" мамандығы бойынша білім беру тұжырымдамасын талдау және әзірлеу үшін жұмыс тобын құру, қоғамға жат көріністердің жолын кесу мақсатында "плагиатқа қарсы" бағдарламасын жетілдіру ұсынылды.
Мерейтойлық ғылыми-әдістемелік конференцияға қатысушылар оқытудың теориялық және әдіснамалық аспектілерін қарастыруға мүмкіндік беретін қоғаммен байланыс саласындағы ғылыми зерттеулердің маңыздылығын атап өтті. Осы мәселені зерттейтін отандық ғалымдар мен мамандар үшін конференциялар, тренингтер мен семинарлар ұйымдастыру және өткізу, олардың жұмыстарын жариялау үшін жағдай жасау да шұғыл қажеттілік болып табылады.
Конференция барысында қатысушылар өз тәжірибелерімен бөлісті, заманауи міндеттерді ескере отырып, қоғаммен байланыс саласындағы отандық жоғары білім беру жүйесінің жаңа тетіктерін қалыптастыруға байланысты өзекті мәселелерді талқылады.
