2025 жылдың 6 ақпанында Алматы қаласындағы Корея Республикасының Бас консулдығында «Шетелдегі корейлермен ынтымақтастық орталығы» ұсынған халықаралық стипендияны тапсыру рәсімі өтті. Марапатталғандардың қатарында әл-Фараби атындағы Қазақ ұлттық университетінің шығыстану факультеті корейтану бөлімінің 3-курс студенті Юн Анжела да болды. Ол сертификат пен 1 200 АҚШ доллары көлеміндегі шәкірақыға ие болды.
Юн Анжела жоғары академиялық жетістіктерін көрсетіп, үздік студент ретінде танылды. Соның арқасында ол қатаң конкурстық іріктеуден өтіп, шәкіртақы иегері атанды. Бағдарламаның демеушісі – Корея Республикасының Сыртқы істер министрлігіне қарасты «Шетелдегі корейлермен ынтымақтастық орталығы». Бұл ұйым 2013 жылы шетелдегі корейлердің білім алуын қолдау және олардың ұлттық бірегейлігін сақтауға көмектесу мақсатында құрылған. Сондай-ақ, тарихи отанымен байланыстарды нығайтуға жәрдемдесіп, жастар мен студенттерге шәкіртақы түрінде қаржылық қолдау көрсетіп, сапар бағдарламаларын ұйымдастырады.
Шәкіртақыға шетелде тұратын корей ұлтының студенттері үміткер бола алады. Іріктеу академиялық жетістіктерге, табыс деңгейіне және басқа да талаптарға негізделеді. Биыл бұл бағдарлама аясында бірнеше қазақстандық студент шәкіртақы иегері атанып, олардың әрқайсысы 1 200 АҚШ доллар көлемінде алды.
Юн Анжела корейтану саласындағы жоғары білім деңгейін тағы бір рет дәлелдеп, қатаң конкурстық іріктеуден сәтті өтті. Оның жетістігі кафедраның барлық студенттеріне үлгі болары сөзсіз.
