Қытайтану кафедрасының доценті Үндістандағы халықаралық семинарда Қазақстанды таныстырды

2025 жылғы 7 ақпанда әл-Фараби атындағы Қазақ ұлттық университетінің қытайтану кафедрасының доценті Дәулет Фатимабибі Ноғайқызы Үндістан үкіметі ұйымдастырған ITEC (The Indian Technical and Economic Cooperation Programme) бағдарламасы аясында өткен Халықаралық семинарда баяндама жасады. Семинар Ченнай қаласындағы Hindustan Institute of Technology & Science (HITS) университетінде өтті және техникалық және кәсіптік білім берудің (TVET) БҰҰ-ның Тұрақты даму мақсаттарына (ТДМ) қол жеткізудегі рөліне арналды.

Өз баяндамасында Фатимабибі Ноғайқызы Қазақстанның 17 ТДМ аясындағы жетістіктерін таныстырып, ТДМ 4 («Сапалы білім») және ТДМ 17 («Тұрақты даму мүддесіндегі серіктестік») бағыттарына ерекше назар аударды. Ол әл-Фараби атындағы ҚазҰУ, шығыстану факультеті және қытайтану кафедрасының осы жаһандық міндеттерді жүзеге асыруға қосқан үлесі туралы айтты.

Семинарға 30-дан астам елдің өкілдері қатысып, кәсіби білім беру саласындағы тәжірибе алмасу және жаңа білім алу мүмкіндігіне ие болды. Фатимабиби Ноғайқызы басқа елдердің әріптестері жасаған баяндамалардың ерекше пайдалы және шабыттандыратын болғанын атап өтті.

Қазақстандық ғалымның беделді халықаралық форумдағы бұл баяндамасы ҚазҰУ-да мамандарды даярлаудың жоғары деңгейін және Қазақстанның жаһандық білім беру бастамаларына қосқан маңызды үлесін көрсетеді.