Арабтану орталығы мен арабтану бөлімінде халықаралық ғылыми семинар басталды
Шығыстану факультеті Арабтану орталығы мен ТШжОА кафедрасы арабтану бөлімінің ұйымдастыруымен "Жасанды интеллектіні араб тілін үйретуде қолданудың тиімді тәсілдері" атты халықаралық ғылыми семинар басталды. Ғылыми семинар ЕАР Білім министрлігі Ғылыми зерттеулер және ақпараттық технология академиясымен (Каир қаласы) бірлесіп ұйымдастырылып отыр. Арабтану орталығының директоры Джубатова Б.Н. қазіргі сандық кеңістік әлеміндегі жасанды интеллектінің маңыздылығын, ғылыми зерттеулер жүргізудегі рөлі мен білім берудегі басымдылықтарын атап өтіп, халықаралық деңгейде ұйымдастырылып отырған ғылыми семинардың өзектілігіне арнайы тоқталды. Ғылыми семинардың мақсаты - жаһандану дәуіріндегі шет тілін үйренуде жасанды интеллектіні қолданудың тиімді тәсілдерін, теориялық және практикалық маңыздылығын көрсете отырып, шетелдік тәжірибемен бөлісу, ЖОО бағдарламаларына енгізудің оңтайлы жолдарын айқындауға бағытталған. Ғылыми семинар спикерлері аталған академияның Ақпараттық және мәдени ақпараттар тарату бөлімінің бас директоры, профессор Абул Футух Юнус Сабри (ЕАР Каир) және әл-Азһар университеті Шариғат және құқық факультетінің (ЕАР Каир) профессоры PhD Амани Махмуди. Ғылыми семинарға әл-Фараби атындағы ҚазҰУ шығыстану факультеті ТШжОА кафедрасы арабтану бөлімінің, философия және саясаттану факультеті ОПҚ және білім алушылары сондай-ақ, Нұр-Мүбарак университетінің студентттері қатысты. Ғылыми семинар 10 ақпаннан 17 ақпанға (2025 ж.) дейін жалғасады. Семинар соңында қатысушыларға сертификат беріледі.
