Әл-Фараби атындағы ҚазҰУ-да туризмдегі жаңа технологиялар туралы көшбасшылық дәріс өтті

2025 жылғы 11 ақпанда Әл-Фараби кітапханасында Қазақстан Республикасы Туризм және спорт министрлігінің Қоғамдық кеңесшісі, Ұлттық индустрия және туризм қауымдастығының президенті Шамиль Раушан Шамильқызының көшбасшылық дәрісі өтті. Іс-шараны география және табиғатты пайдалану факультетінің рекреациялық география және туризм кафедрасы ұйымдастырды.

Дәрістің басты мақсаты – оқытушылар мен студенттерді туризм саласындағы жаңа инновациялық технологиялармен, сондай-ақ гидтер мен аудармашыларға арналған SILKROAD платформасымен таныстыру болды. Спикер туристік индустриядағы цифрлық шешімдер туралы айтып, олардың кәсіби дағдыларды дамытуға, сапалы туристік қызмет көрсетуге, сондай-ақ жаңа жұмыс орындарын ашуға қалай ықпал ететінін түсіндірді.

Іс-шара Тұрақты даму мақсаттарымен (ТДМ) тығыз байланысты:

ТДМ 8 – Лайықты жұмыс және экономикалық өсім, өйткені туризм индустриясының дамуы жастар мен түлектердің жұмыспен қамтылуын арттыруға мүмкіндік береді.

ТДМ 9 – Индустрияландыру, инновациялар және инфрақұрылым, себебі SILKROAD секілді жаңа платформалар мен туризмді цифрландыру қызмет көрсету саласын жаңғыртып, бәсекеге қабілетті еңбек нарығын қалыптастыруға көмектеседі.

ТДМ 4 – Сапалы білім, өйткені туризм саласындағы цифрлық сауаттылықты арттыру студенттердің еңбек нарығында сұранысқа ие білікті маман болуына ықпал етеді.

Студенттер мен оқытушылар ұсынылған технологияларға қызығушылық танытып, жұмысқа орналасу, қосымша білім алу және инновацияларды оқу процесіне енгізу мүмкіндіктері туралы сұрақтар қойды. Бұл дәріс Қазақстандағы ғылым, білім және туризм индустриясы арасындағы өзара байланысты нығайтуда маңызды қадам болды.