Қиыр Шығыс кафедрасының корей бөлімі студенттері «Open Healthcare» оңтүстік кореялық компаниясында тәжірибеден өтуде

Қиыр Шығыс кафедрасы, корей бөлімінің студенттері Шалқар Алуа Қанатқызы, Марлен Аяна және Ғалымжанқызы Ұлдана «Open Healthcare» оңтүстік кореялық компаниясында өндірістік тәжірибеден өтуде. Тәжірибе 20 қаңтар мен 17 наурыз аралығында жалғасып, студенттерге халықаралық медициналық бизнестің заманауи әдістерімен танысуға бірегей мүмкіндік береді.

«Open Healthcare» – денсаулық сақтау саласындағы халықаралық компания. Қазақстандағы өкілі "Open Healthcare Kazakhstan" (OH KZ Clinic) ЖШС 2018 жылы қазақстандық және шетелдік инвесторлармен бірге оңтүстік кореялық серіктестердің қатысуымен құрылған. Компанияның бас кеңсесі Сингапур қаласында орналасқан.

Алматы қаласында Достық даңғылы, 210 Б мекенжайында орналасқан OH KZ Clinic Қазақстан мен Оңтүстік Кореяның медицина саласындағы серіктестікті дамытудың маңызды алаңына айналды. Клиника корей стандарттарына сай жоғары сапалы медициналық қызметтерді ұсынады. Қазақстан халқының корей мәдениетіне, тауарлары мен медициналық қызметтеріне қызығушылығы артып келе жатқанын ескерсек, бұл клиника жеке медициналық қызмет көрсету нарығында маңызды балама бола алады. Айта кетерлік жайт, Оңтүстік Корея – қазақстандық науқастардың шетелде ем алуға жиі баратын екінші ел болып табылады.

Қиыр Шығыс кафедрасының студенттерінің «Open Healthcare» халықаралық компаниясындағы өндірістік тәжірибесі – Қазақстан мен Оңтүстік Корея арасындағы медицина, менеджмент және мәдениетаралық коммуникация саласындағы ынтымақтастықты дамытуға бағытталған болашақ мамандар үшін таптырмас мүмкіндік.