Академиялық ынтымақтастық: ғылым мен білімде тәжірибе алмасу
Білім беру саласындағы халықаралық ынтымақтастықтың маңыздылығы артып келе жатқан заманда, өзара тәжірибе алмасу білім сапасын арттырып, білім алушыларға жаңа мүмкіндіктер ашады. Осындай мақсатпен, әл-Фараби атындағы Қазақ Ұлттық университеті, филология факультеті, Түркітану және тіл теория кафедрасының профессор-оқытушылары мен Қарақалпақстан Республикасы Әжинияз атындағы Нөкіс мемлекеттік педагогикалық институтының Қарақалпақ тілі кафедрасының оқытушылары ф.ғ.к., доцент Алланазаров Есберген Есбосынович, ф.ғ.к., доцент Бекниязов Қонысбай Исакович 2025 жылы 8-18 ақпан күндері академиялық тәжірибе алмасты.
Олар ф.ғ.д., профессор Р.А. Авакова, ф.ғ.д., профессор Г.Б. Мадиева, ф.ғ.д., доцент Ж.Қ. Ибраева, ф.ғ.к., Ж.М. Уматова, PhD доктор Ш.Т. Кудьярова, PhD доктор Қ.Б. Сұлтанбек, аға оқытушы А.У. Даулет т.б. профессор-оқытушылардың сабақтарына қатысып, оқыту әдістемелері мен академиялық бағыттар туралы өзара пікір бөлісті. Түркітану және лингвистика мамандығының студенттері, магистранттары мен докторанттары ф.ғ.к., доцент Алланазаров Есберген Есбосынович және ф.ғ.к., доцент Бекниязов Қонысбай Исаковичпен еркін пікір алмасып, түркітану ғылымының өзекті мәселелерді талқылау мүмкіндігіне ие болды.
Олар профессор-оқытушылардың сабақтарын жоғары деңгейде бағалап, олардың кәсіби шеберліктерін, студенттердің белсенділігі мен білім деңгейін ерекше атап өтті. Өз пікірлерінде білім беру жүйесі мен түркітану, лингвистика саласындағы жетістіктерді жоғары бағалап, алдағы уақытта да осындай ынтымақтастық жалғасын табатынына сенім білдірді.
Бұл тәжірибе алмасу Өзбекстан мен Қазақстан арасындағы білім беру саласындағы ынтымақтастықтың нығаюына, профессор-оқытушылар, студенттер, магистранттар мен докторанттардың өз білімдерін толықтырып, халықаралық тәжірибе жинақтай алуына ықпал ететін маңызды қадам болды.
Ұйымдастырушы: Түркітану және тіл теориясы кафедрасының оқу-әдістемелік және тәрбие ісі жөніндегі орынбасары, PhD доктор, Кудьярова Шолпан Таубаевна.
