«Абай жолы» – ұлттық руханияттың мәңгілік асылы
2025 жылдың 17 ақпанында 6B01701 Қазақ тілі мен әдебиеті мамандығының 4-курс студенті Жанарбек Қарақат «JOO High School Almaty» мектебінен өтіп жатқан оқу тәжірибесінің негізінде 11-сынып оқушыларына Мұхтар Әуезовтің «Абай жолы» роман-эпопеясына арналған ашық сабақ өткізді. Ашық сабақ ТДМ 4: «Сапалы білім беру» мақсаттарын жүзеге асыру аясында ұйымдастырылып, білімнің қолжетімділігін қамтамасыз ету және заманауи технологияларды тиімді пайдалану арқылы оқытудың сапасын арттыруға бағытталды.
Сабақтың мақсаты – оқушыларды қазақ әдебиетінің классикалық шығармаларымен таныстырып, олардың құрылымын талдау арқылы ғаламдық мәселелерді анықтап, сыни ойлау дағдыларын дамыту. Сабақ жасанды интеллект негізінде әзірленген «Қара жорға» биімен сергіту сәтінен басталды. Кейін оқушылар арнайы карточкалар арқылы топтарға бөлініп, білімдерін жүйелеу мақсатында «Wordwall» платформасында тест тапсырмаларын орындады. Негізгі бөлімде оқушылар «Кинолента» әдісі арқылы романның сюжеттік-құрылымдық ерекшеліктерін зерттеп және «Киіз үй» форматындағы менталды карта көмегімен эпопеяда көтерілген ғаламдық мәселелерді талдап, олардың тарихи және заманауи мәнін анықтады.
Сабақтың соңында оқушылар «Padlet» платформасы арқылы кері байланыс беріп, өз ойларымен бөлісті. Бұл ашық сабақ заманауи әдістер мен технологияларды қолдану арқылы оқушылардың шығармашылық және аналитикалық қабілеттерін дамытуға ықпал етті. ТДМ 4 аясында ұйымдастырылған бұл сабақ оқушылардың әдебиетті терең түсініп, оны жаңаша қабылдауына жол ашты.
Шортанбай Шохан, қазақ әдебиеті және әдебиет теориясы кафедрасының аға оқытушысы, практика жетекшісі
