«Қазақстан мен Өзбекстанның ғылыми ынтымақтастығы» тақырыбында дөңгелек үстел өтті.

4-ТДМ «Сапалы білім» аясында 2025 жылдың 18 ақпанында қазақ әдебиеті және әдебиет теориясы кафедрасы мен М.О. Әуезов атындағы Әдебиет және өнер институты «Қазақстан мен Өзбекстанның ғылыми ынтымақтастығы» тақырыбында дөңгелек үстел ұйымдастырды.

Дөңгелек үстелде М.О. Әуезов атындағы Әдебиет және өнер институтының бас директодың орынбасары, филология ғылымдарының кандидаты, доцент Қалиева Альмира Қайыртайқызы, қазақ әдебиеті және әдебиет теориясы кафедрасының меңгерушісі, ф.ғ.д., профессор Темірболат Алуа Берікбайқызы және Өзбекстан Республикасынан арнайы келген қонақтар – филология ғылымдарының кандидаты, Ургенч мемлекеттік педагогика институтының доценті Эшчанова Гавхар Атажановна, оқытушылар Халматова Гулнора Нарматовна, Авезова Гульназ Камиловна – екі ел арасындағы ғылыми ынтымақтастықты нығайту жолдарын талқылады. Сондай-ақ аталған шарада қазақ әдебиеті және әдебиет теориясы кафедрасының доцент м.а., PhD Даутова Гүлназ Рахымқызы мен аға оқытушы Баязитов Бақытқожа Байғожаұлы пікір алмасты.

Дөңгелек үстелдің басты тақырыптарының бірі – Мұхтар Әуезовтің шығармаларын әлемдік деңгейде насихаттау болды. Өзбекстандық қонақтар Мұхтар Омарханұлының шығармаларын өзбек әдебиетіне ықпал еткен туындылар ретінде жоғары бағалап, оның ұлттық құндылықтар мен адамгершілік мәселелерін терең әрі жан-жақты сипаттағанын атап өтті. Ургенч мемлекеттік педагогикалық институтының қадірменді қонақтары «Абай жолы» шығармасының тек қазақ халқы үшін ғана емес, бүкіл Орталық Азия елдері үшін маңызы туралы сөз қозғады. Абай Құнанбаевтың өзбек халқына танытуда М. Әуезов шығармаларының мәні зор.

Дөңгелек үстелде әдебиет саласындағы бірлескен жобалар мен фестивальдар ұйымдастыру, ғалымдар арасында шығармашылық кездесулер өткізу, Қазақстан мен Өзбекстанның ғылыми-мәдени ұйымдары арасындағы болашақтағы ынтымақтастықты нығайту мақсатында бірнеше жобаларды қолға алуды ұсынды. Мысалы, екі ел арасындағы әдеби байланыстарды дамыту, бірлескен көрмелер мен ғылыми-зерттеу жобаларын жүзеге асыру сияқты ұсыныстар айтылды. Өзбекстандық қонақтарға М.О. Әуезов атындағы Әдебиет және өнер институтының қызметкерлері арнайы М. Әуезов Мұражайымен таныстыру үшін арнайы экскурсия ұйымдастырды.

Дөңгелек үстелді ұйымдастыру жұмыстарына «8D02304 – Әдебиеттану» мамандығының 1-курс докторанттары Тойбазар Аяжан, Тұрдәлі Талғат, Кенжеқожаева Алма, Елдос Екпін атсалысты. Дөңгелек үстелдің соңында Ургенч мемлекеттік педагогикалық институтынан келген қатысушылар М.О. Әуезов атындағы Әдебиет және өнер институты мен қазақ әдебиеті және әдебиет теориясы кафедрасына алғыс білдіріп, қорытынды сөз сөйледі. М.О. Әуезов атындағы Әдебиет және өнер институтында өткен бұл дөңгелек үстел екі ел арасындағы мәдени байланысты нығайту үшін маңызды қадам болды. Өзбекстаннан келген қонақтармен болған ашық әрі нәтижелі пікірталас алдағы уақытта екі ел арасындағы ғылыми ынтымақтастықты жаңа деңгейге көтеруге мүмкіндік береді.