«Қазақстанның киелі жерлері – ұлттық мақтанышымыз» тақырыбы бойынша дөңгелек үстел

2025 жылғы 24 ақпанда сағат 17.00-де филология факультетінің шет тілдері кафедрасының оқытушылары ZOOM платформасында география және табиғатты пайдалану факультетінің 1 курс студенттерімен бірлесіп, «ТДМ 4. Сапалы білім беру» тұрақты даму жобасы аясында  «Қазақстанның киелі жерлері – ұлттық мақтанышымыз» тақырыбы бойынша дөңгелек үстел өткізді. 
Дөңгелек үстелдің мақсаты: Қазақстанның киелі жерлерімен танысу, студенттерді мәдени-тарихи ескерткіштерге құрметпен қарауға тәрбиелеу, студенттердің жалпыұлттық құндылықтарын қалыптастыру және дамыту: қазақстандық патриотизм, азаматтық жауапкершілік, мәдениетке, тарих пен дәстүрлерге деген құрмет, ынтымақтастық, үздіксіз білім алу. 
Киелі жерлер ретінде халық арасында ерекше қастерленетін табиғи-мәдени мұра, зайырлы және діни сәулет ескерткіштері, кесенелер, сондай-ақ Қазақ¬стан халқының жадында өшпес із қал¬дырған тарихи және саяси оқиғалармен байланысты орындар ұғынылады. Сонымен қатар, Қазақстанның әлеуметтік-саяси өмірінде маңызды орын алатын, ұлттық бірлік пен жаңғыру нышаны ретінде көрінетін нысандар кіреді. 
Дөңгелек үстелге С.Д. Асфендияров атындағы Қазақ ұлттық медицина университетінің оқытушылары мен шетелдік студенттері қатысты. Іс-шараның модераторы ретінде шет тілдері кафедрасының аға оқытушысы Л.М. Алиярова бірлескен іс-шараға орай құттықтау сөз сөйлеп, дөңгелек үстелдің негізгі міндеттері туралы қысқаша ақпарат берді. 
Студенттер Қазақстан мен Египеттің киелі жерлері туралы презентациялар дайындап ұсынды. «Мейрамхана ісі және қонақ үй бизнесі» мамандығының 1 курс студенті Сандуғаш Орынбаева Түркістандағы Қожа Ахмет Ясауи кесенесі, Маңғыстаудағы Бекет ата жерасты мешіті, Жамбыл облысындағы Айша бибі кесенесі, Тамғалы тас петроглифтері туралы айтып берді. «Қоршаған ортаны қорғау және өмір тіршілігінің қауіпсіздігі» мамандығының студенті Ерасыл Ермекұлы Шығыс Қазақстанның Катонқарағай, Марқакөл, Рахман қайнары және т.б. киелі жерлері туралы егжей-тегжейлі ақпаратпен бөлісті. ҚазҰМУ жалпы медицина факультетінің 3-курс студенті Абдуленин Мұстафа Египеттің киелі жерлері – Ніл өзені, Гизадағы пирамидалар кешені, Луксор және Карнак ғибадатханалары және т.б. туралы презентация ұсынды. 
Презентациялар соңында студенттер тақырыптар бойынша сұрақтар қойып, өз ойларын білдірді және пікірталасқа белсенді қатысты. Сондай-ақ, Египет студенттері еліміздің тарихы мен мәдениеті туралы көптеген жаңа және қызықты деректерді білуге  мүмкіндік алғанын атап өтті. Ұлттың рухани мұрасын құрайтын киелі жерлер әр халықта, әр өркениетте бар. Қасиетті, киелі жерді анықтаудың түпкілікті мәні – туған жеріңді тану, түсіну, бағалау, оған деген сүйіспеншілікті тереңдету.  
Ұйымдастырушылар: Алиярова Л. М., Қайрақбаева Г. С., Қарабаева Б. Н., Абдиназарова С. Ж., Мадиева З. К.