«Мамандық, ғылым, жетістік: әйелдер көзқарасы» тақырыбында дөңгелек үстел
4 наурыз 2025 жылы Тұрақты даму бойынша ЮНЕСКО кафедрасында 8 наурыз – Халықаралық әйелдер күніне орай «Мамандық, ғылым, жетістік: әйелдер көзқарасы» тақырыбында дөңгелек үстел өтті.
Бұл маңызды шара оқытушылар мен студенттерді біріктіріп, ұрпақтар диалогы мен баға жетпес өмірлік тәжірибе алмасудың жарқын үлгісіне айналды.
Кафедра доценттері Тажибаева Тамара Лашқаровна мен Бергенева Нургуль Сагиевна студенттер алдында сөз сөйлеп, әл-Фараби атындағы Қазақ ұлттық университетіндегі көпжылдық педагогикалық қызметі туралы баяндады. Олар кафедраның қалыптасуы, ғылыми жетістіктері мен үздік түлектері жайлы әңгімелеп, ғылым мен кәсіби қызметтегі әйелдердің үлесіне ерекше назар аударды. Өздерінің тәжірибесі арқылы жастарды жігерлендіріп, шабыт берді.
Жылы және сенімді атмосферада доценттер жеке өмірлік оқиғаларымен, кәсіби жетістіктерімен және студенттердің академиялық және мансаптық жолында көмектесетін құнды кеңестерімен бөлісті. Олардың сөздері ғылым мен мамандық саласында жетістікке жетуге ұмтылған жастар үшін бағыт-бағдар болды.
Кездесуді аяқтай отырып, кафедра меңгерушісі Базарбаева Тұрсынқүл Аманкелдіқызы спикерлерге жаңа буын мамандарын тәрбиелеуге қосқан өлшеусіз үлестері үшін алғыс білдіріп, кафедра атынан оларға еңбектері мен жетістіктерін мойындаудың символы ретінде «әл-Фараби» университеттік алтын белгісі табыс етті.
Бұл дөңгелек үстел ғылымдағы әйелдерге деген құрмет қана емес, сонымен қатар қатысушылардың жүрегінде терең із қалдырған шабыттандыратын іс-шара болды.
