«Дамудың рухани аспектілері: Дін және қазіргі әлем» аясындағы тақырып бойынша арнайы іс-шара

Ағымдағы жылдың 2 наурызы күні Тұрақты даму мақсаттарының «Бейбітшілік, әділдік және тиімді институттар» бағытына сәйкес Философия және саясаттану факультеті, Дінтану және мәдениеттану кафедрасының профессор-оқытушылары (К.М.Бишманов, Н.Ж.Байтенова, Б.М.Сатершинов С.М Каупенбаева, М.Р.Балтымова) тарапынан  «Дамудың рухани аспектілері: Дін және қазіргі әлем» аясындағы тақырып бойынша арнайы іс-шара ұйымдастырылды.

Айтулы мәдени шара Алматы қаласындағы (Хаби Халиуллин көшесі, 45а) Қазан Құдай Анасы иконасының құрметіне арналған шіркеуде өтті. Діни, мәдени және тарихи танымдық бағыттағы экскурсияға әл-Фараби атындағы ҚазҰУ-нің дінтану мамандығы бойынша 3 курс студенттері мен  1 докторант қатысты.

Төрткүл дүниеде ертеден қалыптасқан монотеистік діндердің (иудаизм, христиан, ислам) географиялық орналасу тарихы, өзара мәдени-рухани сабақтастықтары мен ықпалдастықтарын ескере отырып, бертінгі кезеңдерде Қазақстан аумағында пайда болған алуан түрлі діни бағыттағы конфессиялардың арасындағы дінаралық диалогтың рөлі және олардың даму  аспектілерінің маңызын түсіну осы кездесудің басты мақсаттарының бірі болды. Осы тұста, соңғы жылдары елордамыз Астанада өткізіліп жүрген әлемдік және дәстүрлі діндер көшбасшылары съезінің толеранттылық контекстіндегі тәжірибесін ерекше атап өткен жөн.

Мәдени шара барысында экскурсия жүргізуші студенттерді шіркеудің 1871 жылдан бастап бүгінгі күнге дейінгі қалыптасу тарихы, ғимараттың архитектурасы және оның қазақстандық христандық қауымдастықта атқаратын  рухани және мәдени байланыстарымен тереңірек таныстыруға тырысты. Әсіресе, қасиетті Қазан соборы астындағы үңгір ішінде орналасқан ғибадатхананың тарихы мен ондағы православ сенімінің рәміздері мен атрибуттары жақсы әсер қалдырды.

Ғылыми-танымдық шараның соңында қатысушылар сапалы білімнің тұрақты даму мақсаттарына жетудегі рөліне қатысты өз пікірлерімен бөлісті.