Ұлтты ұйыстырған ұлттық құрылтай
2025 жылдың 31 наурызында Филология факультетінде Шетел филологиясы және аударма ісі кафедрасының аға оқытушысы Әзімбаева Индира Қайратқызы, «Шетел филологиясы (батыс тілдері)» мамандығының 1 курс магистранттары Бекенова Роза және Қайрат Альмира ұйымдастыруымен «Ұлтты ұйыстырған ұлттық құрылтай» атты ашық кураторлық сағат өткізілді. Іс-шара Тұрақты даму мақсаттарының (ТДМ) 16-шы «Бейбітшілік, әділеттілік және тиімді институттар» және 17-ші «Тұрақты даму мүддесіндегі серіктестік» бағытында өтті. Ашық сабақтың негізгі мақсаты – студенттерге ұлттық құрылтайдың маңыздылығын түсіндіру, елдегі қоғамдық-саяси өзгерістерге қызығушылықтарын арттыру және пікір алмасу алаңын қалыптастыру болды.
Кураторлық сағат барысында студенттер ұлттық құрылтайдың мақсаты мен рөлі, оның Қазақстан қоғамына тигізетін ықпалы туралы мәселелер жан-жақты талқылады. Рөлдік ойын ұйымдастырылып, қатысушылар әртүрлі секциялардың мүшелері ретінде өз ұсыныстарын ортаға салды. Студенттер «Білім және ғылым», «Әлеуметтік даму», «Мәдениет» секілді тақырыптарға тоқталып, өзекті мәселелерді шешу жолдарын қарастырды. Іс-шараға Қазақстанда білім алып жатқан шетелдік студенттер де белсене қатысты. Олар өз елдеріндегі тәжірибелерін ортаға салып, көпұлтты қоғамда бейбітшілік пен ынтымақтастықты сақтау, тұрақты даму мақсаттарына жету жолында пікірлерімен бөлісті. Халықтар достастығы мен мәдениетаралық түсіністік орнатудың маңыздылығын атап өтті. Кері байланыс ретінде студенттер «Шығу билеті» әдісін пайдаланып, сабақтан алған ең маңызды үш түйінді ойларын қағазға жазды. Бұл әдіс олардың іс-шарадан алған әсерін және жаңа білімді қалай меңгергенін бағалауға мүмкіндік берді.
Кураторлық сағат студенттердің белсенді пікір алмасуымен, өзекті сұрақтар мен тың ұсыныстарымен ерекшеленді. Студенттер өз ой-пікірлерін еркін жеткізіп, жаңа білім мен тәжірибе жинады. Кураторлық сағат олардың қоғамдық-саяси белсенділігін арттырып, өзекті мәселелерді шешуде азаматтық позициясын нығайтуға мүмкіндік берді.
Ұйымдастырушылар:
Шетел филологиясы және аударма ісі кафедрасының
аға оқытушысы, Азимбаева И.К.
Шетел филологиясы мамандығының
І курс магистранттары Бекенова Роза, Қайрат Альмира
