Қонақ үй кешендерінің құрылымы мен қызметтерін талдау

2 сәуірде рекреациялық география және туризм кафедрасының оқытушысы Ж.Ж. Төкенова 6В11103-Мейрамхана ісі және қонақ үй бизнесі білім беру бағдарламасының қазақ бөлімінің 3 курс студенттерімен «Қонақ үй кешендерінің құрылымы мен қызметтерін талдау» тақырыбында «Қонақ үй және мейрамхана кешендерінің технологиялық қызметтері» пәні бойынша ашық сабақ өткізді. Ашық сабақтың мақсаты – қонақ үй кешендерінің құрылымы мен негізгі бөлімшелерін зерттеу; қызмет түрлерін талдау және салыстыру; студенттердің шығармашылық ойлауын дамыту.

Ашық сабақ үш негізгі кезеңнен тұрды: теориялық бөлім, зерттеу және практикалық жұмыс. Студенттер үш топқа бөлінді: 1-ші топ қонақ үй кешендерінің құрылымы мен негізгі қызметтері туралы презентация дайындады. Слайдтарда қонақ үйлердің түрлері, олардың инфрақұрылымы және қызмет көрсету ерекшеліктері қарастырылды. 2-ші топ қызықты фактілер мен статистиканы жинады. Олар әлемдегі бірегей қонақүйлер, қызмет көрсету стандарттары және тұтынушылардың үміттері туралы айтты. 3-ші топ студенттердің білімін тексеруге көмектесетін викторина ойынын ұйымдастырды. Бұл интерактивті элемент әрекетті қызықты етті.

Ашық сабақ жоғары деңгейде өтті, студенттер белсенді қатысып, қонақ үй индустриясы туралы білімдерін кеңейтті. Әр топ пайдалы ақпаратты ұсына отырып, өз міндеттеріне шығармашылықпен қарады. Ойын форматы қатысушыларды ерекше қызықтырды және зерттелген материалды бекітуге көмектесті.