Педагогика ғылымын дамытудың жаңа бағыттары

Әл-Фараби атындағы ҚазҰУ-дың ғылыми кітапханасында «Заманауи білім беру парадигмасы контексіндегі профессор Надежда Хмельдің ғылыми мұрасы» атты халықаралық дөңгелек үстел өтті.

Іс-шара Тұрақты даму мақсаттарының №17 – «Тұрақты даму мүддесіндегі әріптестік», №4 – «Сапалы білім беру» бағыттарын іске асыру шеңберінде өтуде. 

Іс-шараның мақсаты – ХХ ғасырдағы қазақстандық педагогика ғылымының жетекші әдіскері Н.Д.Хмельдің постиндустриалды ақпараттық қоғам жағдайындағы заманауи білім беру парадигмасының призмасы арқылы мұрасын қайта қарау.

Ірі тұлға, педагог, профессор Н.А.Хмельді еске алуға арналған шараға Әл-Фараби атындағы ҚазҰУ Педагогика кафедрасының профессоры Ақмарал Мағауова модераторлық етті.

Ұйымдастырушылар: Бегалиева С.Б. – педагогика ғылымдарының докторы, орыс филологиясы жəне əлем əдебиеті кафедрасының профессоры, Əл-Фараби атындағы ҚазҰУ. Магауова А.С. – педагогика ғылымдарының докторы, педагогика кафедрасының профессоры, Қасен Г.А. – педагогика ғылымдарының кандидаты, жалпы жəне қолданбалы психология кафедрасының доценті.

Ауқымды шараның ашылуында ҚазҰУ-дың Басқарма мүшесі – академиялық мәселелер жөніндегі проректор Алтай Қазмағамбетов сөз сөйледі. «Аспирантурада оқып жүргенімде мен Надежда Хмельдің жоғары мектеп педагогикасы бойынша дәрісін тыңдау бақыты бұйырды. Бұл біз үшін ұмытылмас, өте құнды тәжірибе болды. Надежда Дмитрийқызы тек талантты ғалым ғана емес, мықты ұйымдастырушы әрі рухани бай адам болды. Мен ол кісімен бір кафедрада және оның төрағасы болған бір диссертациялық кеңесте қызметтес болдым. Ол осы лауазымнан кеткен кезінде мені өз орнына ұсынды. Сол кезеңде оның маған сенім артқанына алғысым шексіз. ҚР білім беру теориясы мен практикасына тұтас педагогикалық үдерістің қазіргі заманғы теориясын жасаушы ғалым-педагогтің қосқан үлесі баға жетпес», – деді проректор.

Филология факультетінің деканы, ҚР ҰҒА академигі, профессор Баян Жолдасбекова өз сөзінде ұлы ғалым әрі ойшыл әл-Фарабидің туғанына 1155 жыл толуына орай өтіп жатқан шараның маңыздылығын атап өтті. Сондай-ақ ол білім ордасында дәстүрлі Фараби оқулары өтуде, бұл жоғары оқу орындарының ғалымдары мен оқытушылары үшін де символдық мәнге ие екеніне тоқталып, қатысушыларды айтулы оқиғамен құттықтап, дөңгелек үстел жұмысына сәттілік тіледі.

Дөңгелек үстел спикерлері: Илларионова Л.П. – п.ғ.д., Мəскеу мемлекеттік əлеуметтік-педагогикалық университетінің профессоры (Ресей, Мəскеу қ.); Хан Н.Н. - п.ғ.д., Абай атындағы Қазақ ұлттық педагогикалық университетінің профессоры (; Каргин С.Т. - п.ғ.д., Е. Букетов атындағы Қарағанды мемлекеттік университетінің профессоры; Аубакирова Р.Ж. - Ресей Федерациясының п.ғ.д., профессор,Торайғыров университеттің тұлғалық даму жəне білім беру кафедрасының меңгерушісі; Омарова Г.Б.- п.ғ.к.,  «ӨРКЕН» балалардың əл-ауқатының ұлттық ғылыми-практикалық институты» КАҚ ғылыми-əдістемелік бөлімінің жетекшісі , Бегалиева С.Б. - п.ғ.д., орыс филологиясы жəне əлем əдебиеті кафедрасының профессоры, Əл-Фараби атындағы ҚазҰУ , Магауова А.С. - п.ғ.д., Халықаралық педагогикалық білім академиясының Академигі, профессор, Əл-Фараби атындағы ҚазҰУ.

Дөңгелек үстелге қатысушылар заманауи педагогика ғылымының бүгінгі бағыттары, профессор Н.Д.Хмель мұрасын зерттеу және Қазақстанның кәсіби педагогикалық білімінің өзекті мәселелерін талқылады.

Әл-Фараби атындағы ҚазҰУ-дың Баспасөз қызметі