Президент және Халық

Тұтастық пен жаңғырту – тұрақтылық мұраты
Тәуелсіз елімізде қол жеткізген жетістіктеріміз қоғам мен билік арасындағы берік байланыс пен азаматтық қо­ғам институттарының өзара әріптестік қызметі арқасында табысты іске асты. Елбасы әрқашанда алдымен экономика, кейін саясат екендігін үнемі айтып келеді. Бұл ұстаным бүгінгі геосаяси және геоэкономикалық мүдделер қақтығысы және әлемдік қаржылық дағдарыс жайлаған алмағайып заманда бірден-бір дұрыс шешім екендігін уақыт көрсетіп отыр. Елбасының «Ұлт Жоспары – қазақстандық арманға бастайтын жол» атты бағдарламалық мақаласы әлемдік эконо­микалық, саяси ахуалдың күр­делі жағдайында Мәңгілік Ел­дің асқақ асыл арманы мен айқын мұратын шыңдай түсіп, дүниежүзілік қоғамдастықта еліміздің мерейін үстем ететін тұғырнама.
Елбасы «Нұр Отан» партия­сының Төрағасы Н.Назарбаев партияның XVI съезінде сөй­леген сөзінде Мәңгілік Ел үшін қажетті бес реформа туралы айта келіп, «Бес институттық реформа» ел дамуы үшін маңызды бес қадам екендігін атап өткен болатын. Мәңгілік Ел мұратына жетуге апаратын бес қадам елдің тұрақты дамып, сын-қатерлерді бірлесе еңсеруін айқындайды. Бес инстиуттық реформаның мақсаты – елімізді әлемнің өркендеген 30 мемлекетінің қатарына енгізу. 2016 жылдың 1-қаңтарынан бастап бес институционалдық реформаны жүзеге асыру бойынша «100 нақты қадам» Ұлт жоспарын орындаудың практикалық кезеңі басталды. Ұлт Жоспары – еліміздің саяси, экономикалық және әлеуметтік, рухани кемелденуінің іргетасы. Бұл еліміздің өркениеттік және жалпыадамзаттық құн­дылықтарға құрметпен қарай­тындығын дәлелдейді. Саяси мәдениет бұл қоғамдағы түр­лі әлеуметтік, саяси, діни топтардың өзара келісімде және өзара түсіністікте өмір сүріп бірлесе әрекет етуін білдіреді. Әлемнің кейбір елдерінде орын алған саяси текетірестер мен дінаралық және ұлтаралық кикілжіңдер бұл қоғамдағы азаматтық институттардың жетімсіздігінен туындап отыр­ғаны жасырын емес. Саяси шешімдер алауыздықтың емес, қоғамдық келісім мұратына қызмет етуі тиіс. Әлемнің кейбір елдерінде орын алған саяси текетірестер мен дінаралық және ұлтаралық кикілжіңдер бұл қоғамдағы азаматтық институттардың жетімсіздігінен туындап отырғаны жасырын емес. Елбасының жарлығымен құрылған қоғамдық кеңестер қоғамның өзін-өзі реттеуі мен жергілікті өзін басқару механизмін дамыту арқылы адам әлеуетін арттырып, аза­маттардың саяси мәдениеті мен шешім қабылдау үдерісіне қатысу мүмкіндігін кеңейтуге жол ашады.
Мемлекет пен қоғамның гүл­денуіне және өркениеттік жолмен дамуына негіз болатын ел ішіндегі тұрақтылық, дінаралық келісім және ұлтара­лық сый­ластық қағидат­тары – елі­міздің сара саясатының жемісі.
Мәңгілік Елдің саяси, әлеу­меттік, экономикалық жаң­ғы­руы мен рухани түлеуі инно­ва­циялық индустрияландыру, заманауи ғылымды қажет ететін эконо­миканы қалыптастыру, мемлекетті кәсібилендіру, құ­қық­тық санаға негізделген тәртіп пен заңдылық қағида­тын орнату, үнемді энергия көздерін қолдану мен эконо­миканың өңдеуші секторын ұлғайта отырып, сыртқы инвес­тициялардың жаңа көздерін ұтымды тарту және еңбек қа­тынастарының жаңа түрін еңгізу арқасында жүзеге аспақ. Қазақ­стандық ортақ арманды іске асыру жолында бар­ша­мыз азаматтық белсенділігімізді танытып жұмыла еңбек етуіміз қажет. Бұл реформалар мемлекет пен қоғам өмірінің барлық салаларын жаңғыртуға бағытталғандықтан еліміздің жарқын болашағы – жастарды Мәңгілік Ел идеясы құндылықтары негізінде тәрбиелеу және білім беру қазақстандық арманың іске асуының кілті деп білеміз .
Бағдат БЕЙСЕНОВ,
философия ғылымдарының докторы, Әл-Фараби атындағы ҚазҰУ Дінтану және мәдениеттану кафедрасының доценті.