ШЫҒЫСТАНУ ФАКУЛЬТЕТІНДЕ СТУДЕНТТЕР БАЙҚАУЫ СӘТТІ АЯҚТАЛДЫ

Бүгін, 15 қазанда «Қазақстандағы араб тілі айы» атты халықаралық іс-шара аясында жарияланған студенттер байқауы өз мәресіне жетті. Бұл байқау Сауд Арабиясы Корольдігі Король Салман халықаралық араб тілі академиясының (КСХАТА) қолдауымен Әл-Фараби атындағы Қазақ ұлттық университеті шығыстану факультетінде өтті.  Байқау үш бағыт (араб каллиграфиясы, араб поэзиясын мәнерлеп оқу және араб тіліндегі сторителлинг) бойынша Қазақстанда араб тілін үйреніп жүрген студенттер арасында жарияланып,  талантты студенттерді тануға мүмкіндік берді.

Аталған байқауда Әл-Фараби атындағы ҚазҰУ, Нұр-Мүбарак Египет ислам мәдениеті университеті, Абай атындағы ҚазҰПУ, Абылайхан атындағы ҚазХҚжӘТУ, Л.Н.Гумилев атындағы ЕҰУ студенттері белсенділік танытты.    Барлық байқаулар офлайн және онлайн форматтарда өтті. Байқауға қатысқан студенттердің жұмысын бағалауға Қазақстан университеттері мен ғылыми-зерттеу институттарынан беделді арабтанушы-ғалымдар шақырылды. Аталған байқауларға қатысуға ниет білдірген студенттер саны 102, жеңімпаздар саны 9, ынталандыру сыйлығына ұсынылғандар саны 15.  Байқау жеңімпаздары 22 қазанда  жарияланып, оларға Король Салман Халықаралық араб тілі академиясының Бас хатшысы мен әл-Фараби атындағы ҚазҰУ ректоры арнайы дипломдар мен ақшалай сыйлықтар табыстайды. Аталған байқаулар студенттердің араб тілін үйренуге қызығушылығын арттырып, араб тілі мен мәдениетін тануға серпіліс берді.