Әл-Фараби атындағы ҚазҰУ Қытайтану кафедрасының өкілдері Өзбекстанда өткен халықаралық конференцияға қатысты.

2025 жылдың 8 қарашасында Өзбекстан Республикасының Ташкент мемлекеттік шығыстану университетінде (ТМШУ) «Өзбекстан – Қытай: тарихи-мәдени, ғылыми және экономикалық байланыстардың дамуы» атты халықаралық ғылыми-тәжірибелік конференция және «Қытай – Орталық Азия: мемлекетаралық алмасу және ынтымақтастық» атты халықаралық форум өтті.

Іс-шара ЮНЕСКО және ТМШУ жанындағы Конфуций институтының қолдауымен ұйымдастырылып, Орталық Азия елдерінен, Қытайдан және басқа да мемлекеттерден келген жетекші ғалымдар мен зерттеушілерді, оқытушыларды бір арнаға тоғыстырды.

Әл-Фараби атындағы Қазақ ұлттық университетін бұл беделді ғылыми жиында Қытайтану кафедрасының меңгерушісі Оразақынқызы Фарида, сондай-ақ кафедраның докторанттары Пак Раиса Леонидовна пен Чэнь Цзясюй таныстырды.

Пленарлық және секциялық отырыстар барысында ҚазҰУ өкілдері өздерінің ғылыми зерттеу нәтижелерін ұсынды:

• Оразақынқызы Фарида мен Пак Раиса Леонидовна «Advancing Chinese Language Teaching through Innovative Technologies» атты баяндама жасап, инновациялық цифрлық технологияларды пайдалану арқылы қытай тілін оқытудың заманауи тәсілдерін талқылады.
• Чэнь Цзясюй «The Linguistic Powerhouse: A CSP-Driven Model for Fostering High-Quality Human Resources for Sino-Uzbek Economic Cooperation» атты баяндамасында Қытай мен Өзбекстан арасындағы экономикалық ынтымақтастықты дамытуға бағытталған жоғары білікті кадрларды даярлау үлгілерін ұсынды.

Әл-Фараби атындағы ҚазҰУ өкілдерінің Ташкенттегі халықаралық конференция мен форумға қатысуы Қазақстан, Өзбекстан және Қытай арасындағы ғылыми және академиялық байланыстарды нығайтудағы маңызды қадам болып табылады. Бұл іс-шара шығыстану, лингвистика және мәдениетаралық коммуникация салаларындағы университетаралық ынтымақтастықты кеңейтуге ықпал етті.