Студенттердің экологиялық санасы – тұрақты дамудың факторы

2025 жылдың 14 қарашасында әл-Фараби атындағы Қазақ ұлттық университетінің орыс филологиясы және әлем әдебиеті кафедрасының оқытушысы Қайырбек М.Н. «Кадастр» мамандығының 1-курс студенттерімен бірге «Студенттердің экологиялық санасы – тұрақты дамудың факторы» атты дөңгелек үстел өткізді.

Іс-шараның мақсаты – студенттердің экологиялық мәдениетін қалыптастыру және әрбір адамның табиғи тепе-теңдікті сақтау жолындағы жеке жауапкершілігін арттыру болды. Дөңгелек үстелдің модераторы, оқытушы Қайырбек М.Н., тұрақты дамудың экологиялық ойлау мен жастардың белсенді азаматтық ұстанымынсыз мүмкін еместігін атап өтті.

Кездесу барысында студенттер экология мен климаттың өзгеруі мәселелеріне арналған ғылыми жұмыстарын және мультимедиялық презентацияларын ұсынды. Өз баяндамаларында олар келесі өзекті тақырыптарды қарастырды:

• Климаттық өзгерістердің Қазақстан биоалуантүрлілігіне әсері;

• Көміртек шығарындыларын азайтудың жолы ретінде жаңартылатын энергия көздерінің рөлі;

• Қалалардың климаттың өзгеруіне бейімделуі;

• Тұрақты болашақты қалыптастырудағы экологиялық білімнің маңызы.

Әрбір баяндама тыңдаушылардың қызығушылығын туғызып, белсенді пікірталасқа себеп болды. Студенттер өз ойларымен бөлісіп, экологиялық сауаттылықты арттыру жолдары бойынша ұсыныстар айтты. Қатысушылар тұрақты дамудың негізі – әр адамның жеке жауапкершілігі, экологиялық мәдениет пен табиғи ресурстарға ұқыпты қарау екенін атап өтті.

Мұндай іс-шаралар студенттердің ғаламшарымыздың болашағына деген жауапкершілігін арттырып, әл-Фараби атындағы ҚазҰУ-дың тұрақты даму стратегиясында көзделген құндылықтарды нығайтуға ықпал етеді.

Қайырбек М.Н.

Әл-Фараби атындағы ҚазҰУ