Жануарларды зарарсыздандыру – ізгілікті шара: Алматы қаласындағы №134 лицейде ТДМ 17 аясында өткен семинар

22 желтоқсан 2025 жылы Алматы қаласындағы №134 лицейде БҰҰ-ның ТДМ 17 — «Тұрақты даму мүддесіндегі әріптестік» аясында «Гумандық және денсаулық: жануарларды зарарсыздандыру қажет пе?» тақырыбында семинар өтті.

Іс-шараның бастамашысы әрі ұйымдастырушысы әл-Фараби атындағы Қазақ ұлттық университетінің ботаника және агроэкология кафедрасының аға оқытушысы Әбидқұлова К.Т. болды. Семинар ветеринар дәрігер, зооволонтер және Inu Foundation қайырымдылық қорының (@shiba_help_kz) өкілі Динара Жақыповамен бірлесіп өткізілді. Семинарға лицейдің 10-сыныптарынан 27 оқушы қатысты.

Кездесу барысында Динара Жақыпова үй жануарларын стерилизациялау және кастрациялау туралы айтып, бұл процедураға жауапкершілікпен қарауға кедергі келтіретін кең таралған мифтерге ерекше тоқталды. Ол зарарсыздандырудың қаңғыбас жануарлар санының артуының алдын алудағы ең тиімді әрі гумандық тәсілдердің бірі екенін, сондай-ақ қоғамдық денсаулық тұрғысынан да маңызды шара екенін атап өтті.

Баяндаманың жеке бөлігі Inu Foundation қайырымдылық қорының қызметіне арналды. Қор сиба-ину және акита-ину тұқымды иттерге ғана емес, басқа да иттерге көмек көрсетіп, оларды құтқарумен және жаңа үй табуға жәрдемдесумен айналысады. Спикер волонтерлік жұмыстағы жеке тәжірибесімен бөлісіп, жануарларға әртүрлі жолмен көмектесуге болатынын және мұндай қатысу түрлері тек ересектерге ғана емес, мектеп оқушыларына да қолжетімді екенін айтты.

Семинар аудитория тарапынан үлкен қызығушылық тудырды. Оныншы сынып оқушылары баяндаманы мұқият тыңдап, белсенді түрде сұрақ қойып, өз ойларымен бөлісіп, талқылауға қатысты. Бұл оқушылардың жануарларға гумандық қарым-қатынас пен әлеуметтік жауапкершілік тақырыбына шынайы қызығушылық танытқанын көрсетті.

Ботаника және агроэкология кафедрасы