ҚазҰУ ғалымдары Алматы облысының ТЖ департаменті қызметкерлеріне оқу семинарын өткізді

2026 жылғы 29 қаңтарда Әл-Фараби атындағы Қазақ ұлттық университеті өкілдері Алматы облысының Төтенше жағдайлар департаменті қызметкерлері үшін оқу семинарын өткізді. Оқытуға Тұрақты даму және табиғатты ұтымды пайдалану орталығының директоры Касенов М.К., География және табиғатты пайдалану факультетінің жетекші ғылыми қызметкері Ульман А.А., сондай-ақ Метеорология және гидрология кафедрасының ғылыми-инновациялық жұмыс және халықаралық байланыстар жөніндегі орынбасары Раймбекова Ж.Т. қатысты.

Оқу ТЖ департаментінің базасында өтті және төтенше жағдайлардың алдын алу бөлімшелерінің басшылық құрамының және мамандарының геодинамикалық тәуекелдерді бағалау және басқару саласындағы кәсіби құзыреттілігін арттыруға бағытталды. Дәріс барысында Алматы облысының таулы және тауалды аймақтарына тән сел, көшкін және басқа да қауіпті табиғи құбылыстарды қоса алғанда, геодинамикалық үдерістер жөніндегі заманауи ғылыми көзқарастар қарастырылды. Климаттың өзгеруі мен антропогендік қызметтің геодинамикалық үдерістердің жиілігі мен қарқындылығының артуына әсеріне ерекше назар аударылды.

Қатысушыларға ҚазҰУ ғалымдары жүзеге асырып жатқан ғылыми жобаның негізгі нәтижелері Төлеби ауданының мысалында таныстырылды. Ұсынылған материалдар аумақтардың қауіптілікке бейімділік деңгейін төмендету тәсілдері мен негізгі тәуекел факторларын талдауды қамтып, ТЖ департаменті мамандары тарапынан үлкен қызығушылық пен белсенді талқылауға себеп болды. Кездесу соңында Алматы облысындағы геодинамикалық үдерістер бойынша бірлескен ғылыми зерттеулер жүргізу перспективалары, сондай-ақ университет пен төтенше жағдайлар саласындағы мемлекеттік органдар арасындағы одан әрі ынтымақтастық форматтары талқыланды.

Көшпелі оқыту семинарларын өткізу ҚазҰУ-дың ғылыми нәтижелерді университеттен тыс ортаға тарату стратегиясының маңызды бөлігі болып табылады және БҰҰ-ның Тұрақты даму мақсаттарына, атап айтқанда ТДМ 11 – Тұрақты қалалар мен елді мекендер және ТДМ 13 – Климаттың өзгеруімен күрес мақсаттарына қол жеткізуге үлес қосады. ҚазҰУ табиғи қауіп-қатерлерге өңірлердің тұрақтылығын арттыру мақсатында тәжірибеге бағытталған оқытуды дамыту және мемлекеттік құрылымдармен өзара іс-қимылды нығайтуды жалғастыруда.