Бауырлас елдер ғалымдары бас қосты

Қырғыз мемлекеті астанасындағы Манас универ­ситетінде Түркі өркениетін зерттеу және тәжірибе орталығының ұйым­дас­ты­руымен Түркия, Қырғызстан, Әзірбай­жан, Қазақстан, Түрікменстан және Өзбекстан сынды түркі әлемінің алты елінен жиналған 230-дай ғалым мен зерттеушінің басын қосқан Түркі өркение­тінің халықаралық конгресі өтті. Осы іс-шараға бауыр­лас елді қолдауға ҚазҰУ-дың филология факультетінен бірқатар оқытушылар мен докторанттар барып келді. 

Жаһандану заманындағы «Түр­кі әлеміндегі білім және мәдениет» деген аса бір өзекті тақырыпты арқау еткен бұл конгреске университет  про­фессорлары, докторанттары мен магистранттары атынан жалпы саны 43 мақала (22-сі офлайн, 21-і онлайн қатысты) жіберілді. Түркі әлемінің білімі мен  мәдениетіне аса қызы­ғу­шы­лықпен қарағандықтан әрі Түркітану және тіл теориясы ка­федрасының магистранты ретінде бұл конгреске өз үле­сімді қосуды жөн көрдім. «Шетел тілі: екі шетел тілі» ма­ман­дығы бойынша білімімді жетілдіріп жатқандықтан, білім беру, шет тілдерін оқыту бағы­тын­дағы «The features of e-books in educational process» тақы­рыбындағы баяндамам­мен қатыстым.

Бұл конгрестің мақсаты түр­кі әлемінің негізгі білім беру және мәдени аспектілерін ха­лық­аралық тұрғыдан қарас­ты­ру болғандықтан, аталған  бағыттан басқа, конгрестің ішкі тақырыптары: тарих, тіл және әдебиет, мәдениет және ком­муникация, мә­дениет­ара­лық коммуникация, мәдениетті сақ­тау және тасымалдау мәсе­ле­лері талқыланды. Сондай-ақ құндылық туралы білім беру, мәдениеттану, жаһандану мә­се­лесі, тілдік білім беру және зерт­теу, түркі әлемінің әде­бие­ті, тіл және әдебиет сала­сын­дағы зерттеулердің өзекті мә­се­лелері, тіларалық аудар­ма (аударма), тілдік зерттеу­лер­дің за­манауи әдістері, түр­ко­ло­гия­лық зерттеулер, са­лыс­тыр­ма­лы түркі диалек­тілері, мәде­ниет пен қоғамның өзара әре­кеті, коммуникативтік білім, этика, әлеуметтік же­лі­лер­дегі қарым-қатынас, жа­һан­дық ком­муникациялар сын­ды тың әрі өзекті тақырыптарды қам­ты­ды. Осы тақырыптар ая­сын­дағы алты елдің ғалым­да­ры мен зерттеушілері ұсын­ған мақа­лалар мен тезистер де «миға шабуыл жасайтындай» қы­зықты  ақпаратқа толы бол­ды. Түртіп алып, ой-санаға қо­рек еткенге – бұл таптырмас құнды білім. Ең бастысы, кон­гресс барысында түркі әлемі­нің терең мәдени мұрасынан мағлұмат алып, рухани байып қайттық.

Толқын ӨМІРЗАҚОВА,

филология факультетінің 2-курс магистранты