Университет ұжымының кәсіби деңгейіне тәнтімін

Жас ғалымдар­дың білімін шың­дап, ғылымдағы тәжіри­бесін жетіл­діруде шетелдік ғалым­дар­дың тәжірибе алмасуы университеттің елдегі және халықаралық ғылыми қоғамдас­тық­тағы бет-бейнесі мен орнын нығайтуға оң ықпал жасамақ. Жаһандық стандарт­тарға сай сапалы мамандар даярлау – оқу ордасының басты міндеттерінің бірі. Осы мақсат аясында Экономика және биз­нес жоғары мектебі жыл сайын магис­трант­тар мен докто­рант­тарға дәріс оқуға шетелдік профессор­лар­ды шақыруда. Финляндияның Йювя­скюля универ­ситетінің профессоры Айжаз Шейх өз тәжірибесімен бөлісті. 

Доктор Айжаз – «E-Business Research International» журна­лы­ның редакциялық шолу ке­ңесінің мүшесі және арнайы шығарылымның редакторы. Финляндияда және басқа ел­дер­де он бес жылдан астам уни­верситет деңгейінде оқы­ту­шылық және бес жылға жуық ғылыми зерттеулерде елеулі тәжірибесі бар. Ол Қазақстан, Финляндия, Швеция, Нор­ве­гия, АҚШ, Оңтүстік Африка, Иран, Сауд Арабиясы және Гана елдерімен халықаралық ғы­лыми ынтымақтастық бай­ла­ныста. Бес жыл уақыт ара­лы­ғында 350-ден астам дәйек­сөздері бар әйгілі ISI ин­декс­телген журналдарында жарияланымдары мен конфе­рен­ция материалдары жарық көрді. Профессордың акаде­мия­лық мамандығына цифр­лық маркетинг, мобильді қар­жы­лық қызметтер және ортақ цифрлық экономика т.б. тақы­рыптар арқау болуда. Ғалым ҚазҰУ-ға келгендегі алғашқы әсе­рін суреттеп берді.

– Алматы – жаһандық һәм дәс­түрді үйлестірген қайнаған қала. Алатаудың баурайынан орын тепкен шаһардың әйдік ғи­мараттары, көне мешіттері мен сәулетті сарайлары таң­ғал­дыратын көрініске толы. Ал саябақтары қалалық өмірдің қарбалас қарқынынан демалу­ды қамтамасыз етеді. Міне, осын­дай алып қаланың қақ ор­тасынан орын алған ҚазҰУ Қа­зақ­стандағы ең беделді уни­верситеттердің бірі ретінде кеңі­нен танымал. ҚазҰУ сту­денттеріне сапалы білім беруі­мен әйгілі. ҚазҰУ халықаралық академиялық институттармен және ғылыми орталықтармен тығыз байланыста, бұл оның бағдарламаларының бүгінгі жа­һандық экономиканың қа­жет­тіліктеріне сай болуын қам­та­масыз етуге көмектеспек, – дей келе, профессор Эко­но­мика және бизнес жо­ғары мектебінің Менеджмент кафедрасында атқарған азды-көпті жұмыс­та­рына да тоқтал­ды.

– Менің оқыту жолым – сан­дық технологиялар және ғы­лыми зерттеулер бойынша бір­неше дәрістерді қамтиды. Со­нымен қатар оқытушылар мен қызметкерлерге арнал­ған бірнеше сессия ұйымдас­тыр­дым. Өз баянда­ма­ла­рымда әдетте Еуропа уни­вер­ситет­те­рінде кең таралған оқыту, пе­дагогика және зерттеу сала­сын­дағы озық тәжі­ри­белеріммен бөлістім. Эконо­мика және бизнес жоғары мек­тебінде әлемдегі ең үздік деп саналатын Финляндия білім беру жүйесі бойынша эксклю­зив­ті сессия ұйымдастырдық. Мен Финляндияның білім беру жүйесінің пайда болуын, өсуін және қазіргі жағдайын түсін­діріп бақтым. Финляндиялық білім беру жүйесі – әділет­ті­лікке, ұстаздарды дайындауға, шы­ғармашылыққа және сыни ойлай білуге бағытталғаны үшін жоғары дәрежеде баға­ла­на­ды. Осы бағытта түрлі ұсы­ныстарымды ортаға салдым, – деді профессор.

Оқу бағдарламасы аясында профессор Айжаз Шейх білім алушылар мен оқытушы-про­фес­сорлар құрамы үшін «Қа­зақ­­стандағы тұрақты даму жо­лындағы цифрлық биз­нес пен цифрлық экономиканы түсіну» курсы бойынша се­минар са­бақ­тарын өткізді. Сту­денттер мен оқу орнының қыз­мет­кер­лері үшін «NVivo және SmartPLS зерттеулері бойын­ша ғы­лыми ізденістерді қалай жүр­гізу керек және деректерді талдауға арналған қосымша­лар­ды қалай пайдалану ке­рек?», «Теориялық модельдер мен құрылымдарды қалай жа­сауға болады және оларды ғылыми зерттеулерде жоғары сапалы Scopus журналдарында жариялау үшін пайдаланудың жолдары қандай?», «Қазақ­стан­да ғылыми-зерттеу басы­лым­дар мәдениетін қалай на­си­хаттауға болады?», «Ғылыми зерттеулер Қазақстан үкі­ме­тіне, өнеркәсібіне, қоға­мына қандай пайда әкелуі мүмкін?» деген тақырыптарда оқыту тренингтері мен семинарлар өткізді.

 ҚазҰУ сту­денттеріне сапалы білім беруі­мен әйгілі. ҚазҰУ халықаралық академиялық инс­ти­тут­­тар­мен және ғылыми орталықтармен тығыз бай­ланыста, бұл оның бағдарламаларының бү­гінгі жа­һандық экономиканың қа­жет­тіліктеріне сай бо­луын қам­та­масыз етуге көмектеспек.

– ҚазҰУ-да болған кезімде «Цифрлық дәуірдегі оқыту және педагогика» тақы­ры­бында арнайы сессия ұйым­дас­тырдым. «Технологиялар мен цифрландыру оқыту мен педагогикалық тәсілдерді қа­лай өзгертті және уни­вер­ситет студенттерінің оқуын, курс маз­мұнына деген құш­тар­лы­ғын, оқуға деген қызы­ғу­шы­лығын арттыру үшін не істеу ке­рек?», «Жас түлектерді инно­ва­циялық, жоғары талапты еңбек нарығына дайындау қа­лай болмақ?» деген сұрақтарға цифрлық дәуірдің басты мә­селесі ретінде жауап табуға тырыстық. Экономика және биз­нес жоғары мектебінің де­кан орынбасарлары мен ка­фе­дра меңгерушілері де қатысқан осы сессияда мен Финлян­дия­да күнделікті сабақ барысында қолданатын әртүрлі педаго­ги­калық тәсілдерді түсіндіріп, көрсеттім. Мәселен, аталмыш жаңа педагогикалық тәсіл­дер­ге – синхронды (бетпе-бет/он­лайн және офлайн) және асин­хронды (алдын ала жазылған бейнелер/YouTube) кейс-әдісті оқыту, visio-case әдіспен оқы­ту, диалогтік оқыту, аралас оқыту, ойын негізіндегі оқыту, си­муляциялар, подкастар және прайм-тайм режимінде оқы­ту сияқты тәсілдерді жат­қызуға болады. Мен белді университеттің көптеген да­рын­ды студенттерімен және профессорлық-оқытушылық құрамымен кездескенім үшін қуаныштымын. Сондай-ақ өз салам бойынша деректер жи­науға және зерттеу жүргізуіме ҚазҰУ-дың Экономика және бизнес жоғары мектебінің ре­сурстары мен жан-жақты қол­дауы көмектесті. ҚазҰУ ұжы­мы­ның кәсіби деңгейі мен іскерлігінің жоғарылығына тән­ті болдым. Сөз соңында Қазақ ұлттық университетіне оқы­ту­шылық сапарымда көрсетілген қонақжайлылық үшін риза­шы­лығымды білдіргім келеді, – деп сөзін тамамдады ғалым.

Нұрбек НҰРЖАНҰЛЫ