Әл-Фараби атындағы ҚазҰУ-да мектептерге барып, кәсіби бағыт-бағдар беру жұмысы жыл бойы жүргізіледі. Шығыстану факультетінде де осы жұмыс аясында Қазақстанның түкпір-түкпірінде орналасқан мектептермен тығыз жұмыс жүргізілуде. Жоспарланған факультетішілік онлайн, офлайн кездесуден басқа, әр кафедра, әр оқытушы осы бағытта жұмыс істейді. Жыл сайын осындай жұмыстың нәтижесінде шығыс тілдеріне қызығушылық танытқан студенттердің саны көбеймесе, азайған емес.
Осындай мектеп пен университет арасындағы ынтымақтастықтың бастауы ретінде Шымкент қаласында орналасқан «Абадан» мектебіне кәсіби бағыт-бағдар беру мақсатында өзіміз бас болып, іссапар ұйымдастырдық.
«Абадан» мектебі – Шымкент қаласындағы жапон мектептерінің оқыту жүйесін өз білім беру жүйелеріне енгізіп жатқан білім ордасының бірі. Мектеп әкімшілігінің айтуынша, жан-жақты зерттеу жүргізіліп, нәтижесінде осы жапон оқыту жүйесі біздің қазақи болмысқа жақын деген ниетпен мектепке енгізуге шешім қабылданған екен. Жапон мектептерінің үлгісіндей, «Абадан» мектебінде балалар өз қолымен өсімдік түрлерін егіп, оны өздері қарап, баптайды. Сондай-ақ мектепте балаларды қоршаған ортаға мейіріммен қарауға, табиғатты аялап, қорғауға үйрету үшін үй жануарларын ұстайды. Сонымен қатар жапон тіліне, Жапонияға қызығушылық танытқан оқушыларға жапон тілі факультатив ретінде оқытылады. Осындай жапон біліміне, жапон мәдениетіне қызығушылық танытып жатқан мектепті жапонтану бөлімінің оқытушылары Жапониямен жақын таныстыру мақсатында оқушылармен кездесу өткізді. Кездесу шығыстану факультеті Қиыр Шығыс кафедрасының жапонтану бөлімімен таныстырудан басталды. Жапония, жапон тілі, жапон университетінде білім алу мүмкіндігі туралы презентация жасалып, кездесу Жапонияның ұлттық киімі – кимоно кигізу мастер-класымен аяқталды.
Осы кездесуде балалардың жапонтануға деген қызығушылығын оятып, болашақта жапон тілін оқып, екі ел арасындағы байланысты жалғастыратын көпір боларына сенім мол. Сөйтіп, білім мен ғылым, бизнес, дипломатия саласында жүрген жапонтанушылар қатарын көбейтсе, біздің оқытушылардың еңбегінің ақталғаны.
Самал БОРАНҚҰЛОВА,
Әсия НҰРЕЛОВА,
Қиыр Шығыс кафедрасының оқытушылары
Басқа жаңалықтар
