«Тәуелсіздік ұрпақтары» гранттар конкурсы мен «Дарын» жастар сыйлығының жеңімпаздары анықталды

Жеңімпаздар қатарында Әл-Фараби атындағы Қазақ ұлттық университетінің жас ғалымдары бар. 

Астанада 2024 жылдың 11 желтоқсанында Мемлекет басшысының тапсырмасымен құрылған «Тәуелсіздік ұрпақтары» гранттар конкурсының жеңімпаздары мен мемлекеттік «Дарын» жастар сыйлығының лауреаттарын марапаттау рәсімі ҚР Мәдениет және ақпарат министрі Аида Балаеваның қатысуымен өтті.

Кәсіби қазылар алқасы «Дарын» жастар сыйлығының лауреаттарын «Әдебиет», «Ғылым», «Дизайн және бейнелеу өнері», «Журналистика», «Классикалық музыка», «Креативті бастамалар», «Спорт», «Театр және кино», «Эстрада» және «Халық шығармашылығы» номинациялары бойынша таңдады.

Соның ішінде «Ғылым» номинациясы бойынша Әл-Фараби атындағы ҚазҰУ-дың Электрохимиялық өндіріс технологиялары зертханасының меңгерушісі, доцент Фёдор Мальчик «Дарын» сыйлығының иегері атанды.

Ал «Әдебиет» бағыты бойынша «Дарын» сыйлығы  журналистика факультетінін докторанты, ақын Бауыржан Әлқожаға берілді.

Мемлекеттік «Дарын» жастар сыйлығының 20 жеңімпазына «Дарын» мемлекеттік жастар сыйлығының лауреаты» атағы беріліп, естелік статуэткалар мен ақшалай сыйлықтар табысталды.

Ал «Тәуелсіздік ұрпақтары» грантының жеңімпазы ретінде үздік жобаларды ұсынған 30 жас қазақстандық таңдалды. Солардың қатарында оқу ордасының екі оқытушысы – механика-математика факультетінің аға оқытушысы Бірлік Сағитжанов пен  химия факультетінің оқытушысы Қанат Бекназаров бар. Қос оқытушы «Ғылым» бағыты бойынша жеңіске жеткен.

«Тәуелсіздік ұрпақтары» конкурсының әр жеңімпазына 3 млн теңге көлемінде жүлде берілді.

Жас ғалымдарды жеңістерімен шын жүректен құттықтаймыз!