ҚазҰУ онлайн курсы Coursera-да жарияланды
Әл-Фараби атындағы Қазақ ұлттық университетінің «Мәдени антропология» жаппай ашық онлайн-курсы (ЖАОК) Coursera халықаралық білім беру платформасында Қазақстанның жоғары және жоғары оқу орнынан кейінгі білім беру ұйымдары (ЖЖОКБҰ) үшін жарияланды.
«Мәдени антропология» курсы ҚР Ғылым және жоғары білім министрлігі қолдаған Coursera-Qazaqstan жобасы аясында қазақстандық ЖАОК коллекциясына енгізілді. Оны философия ғылымының докторы, философия және саясаттану факультетінің Дінтану және мәдениеттану кафедрасының доценті Ажар Қуанышбекқызы әзірледі.
Курстың негізгі мақсаты – мәдени антропология туралы тұтас түсінік беру, мәдени-антропологиялық зерттеулер мен оның әдістерін таныстыру. Курс экономикалық, саяси, гендерлік, құқықтық және әскери қызмет, сондай-ақ әртүрлі қоғамдар мен мәдениеттердегі әлеуметтік-мәдени құбылыстар мен процестерді зерттеу сияқты негізгі тақырыптарды қамтиды.
Курс тыңдаушылары аналитикалық және зерттеу дағдыларын дамытуға, сондай-ақ ғылыми зерттеулерді өз бетінше зерттеу жүргізу қабілетін жақсартуға көмектесетін білім алады. Курс әлеуметтік-гуманитарлық пәндер жүйесінің органикалық бөлігі болып табылады және философия, әлеуметтану, дінтану, саясаттану және басқа да көптеген білім салаларымен тығыз байланысты.
Coursera-дағы қазақстандық ЖАОК коллекциясына курстың қосылуы Әл-Фараби атындағы ҚазҰУ-дың халықаралық білім беру қызметіндегі маңызды қадамы болып табылады.
Курс авторы мен Әл-Фараби атындағы ҚазҰУ ұжымын студенттердің онлайн білім алу мүмкіндіктерін кеңейтетін маңызды жетістіктерімен құттықтаймыз!
