Экологиялық сауаттылық бойынша ашық тәрбие сағаты
2025 жылғы 4 ақпанда педагогикалық практика шеңберінде әл-Фараби атындағы Қазақ ұлттық университетінің Педагогика және білім беру менеджменті кафедрасының оқытушылары – п.ғ.к., доцент Б. Иманбекова мен М.Мырзағұлованың жетекшілігімен «8D02302 – Аударма ісі(батыс тілдері)» мамандығының 1 курс докторанттары А. Шайманов және Ж. Бүркітбаева 12-ші тұрақты даму мақсатының («Ұтымды тұтыну және өндіріс») міндеттеріне сәйкес «Қайта өңдеу және қайта пайдалану» тақырыбына ашық тәрбие сағаты өткізді.
Іс-шара Алматы қаласының «Алгорифм» физика-математика лицейінде ұйымдастырылды және 10-11 сынып оқушыларын, лицей оқытушыларын, сондай-ақ әл-Фараби атындағы Қазақ ұлттық университетінің студенттерін жинады. Тәрбие сағатының негізгі мақсаты мектеп оқушыларының экологиялық сауаттылығын қалыптастыру және тұтыну әдеттерін өзгерту болды.
Іс-шара барысында қатысушылар қалдықтарды сұрыптауға, қоқыстарды қайта өңдеуге және қайта пайдалану тәжірибесіне қатысты өзекті мәселелерді талқылады. Пікір алмасу, ойын тапсырмаларын орындау, сондай-ақ сауалнама жүргізу жұмыстарын қамтып интерактивті форматта өткен тәрбие сағаты ресурстарды қайта өңдеу және қайта пайдалану арқылы экологиялық мәселелерді шешудің инновациялық тәсілдерін анықтауға мүмкіндік берді. Тәрбие сағатының қорытындысы бойынша қатысушылар экожүйені сақтау әр адамның ұжымдық жауапкершілігі, ал саналы тұтыну қоғамның тұрақты дамуына маңызды қадам болып табылады деген қорытындыға келді.
