Ашық сабақ: «Жерге меншік құқығы» (15 ТДМ «Құрлықтық экожүйені сақтау» аясында)

2025 жылдың 17 ақпанында әл-Фараби атындағы Қазақ ұлттық университетінің заң факультетінде «Кеден, қаржы және экологиялық құқық» кафедрасының аға оқытушысы Есекеева Айнаш Акимсаловна «Жер құқығы» пәні бойынша 305 оқу тобы студенттерімен «Жерге меншік құқығы» тақырыбында ашық семинар сабағын өткізді. Ашық сабаққа кафедра меңгершісі Г.А. Куаналиева, кафедра меңгерушісінің орынбасарлары Э.С. Куандыкова, Г.К. Рашева қатысты. Ашық семинар сабағы БҰҰ-ның 15-мақсаты – «Құрлықтық экожүйені сақтау» шеңберінде ұйымдастырылды.
Сабақтың негізгі мақсаты – қазіргі таңда құрлықтық экожүйеде орын алып жатқан өзгерістер мен мәселелерді талқылау, олардың себептері мен салдарын анықтау. Сонымен қатар, студенттермен бірге осы мәселелерді шешудің ықтимал жолдарын қарастыру, экожүйенің ерекшеліктерін зерттеп, жаңа ақпараттармен танысу.
Сабақ барысында студенттер жерге меншік құқығының экожүйеге тигізетін әсерін, құқықтық реттеудің маңыздылығын және экологиялық заңнаманың тиімділігін талқылады. Әр студент өзінің осы мәселеге қатысты көзқарасын білдіріп, өзекті ұсыныстар ұсынды. Пікірталас барысында жердің заңды түрде қорғалуы, табиғи ресурстарды тиімді пайдалану және тұрақты даму қағидаттарын сақтау мәселелері кеңінен қозғалды.
Ашық сабақ студенттердің белсенділігімен, өзекті мәселелерді талдаумен және ұсыныстар айтумен ерекшеленді. Осындай шаралар экологиялық құқықтың қоғамдағы маңызын терең түсінуге, табиғатты қорғау және тұрақты даму бағытында жаңа идеялар қалыптастыруға ықпал етеді.