Көшбасшылық және ұйымшылдық: бірлескен шешімдер күші

2025 жылдың 18 ақпанында Тұрақты даму мақсаттарына (ТДМ-17) сәйкес «Көшбасшылық және ұйымшылдық: бірлескен шешімдер күші» атты ашық тәрбие сағаты өтті. Іс-шараны әл-Фараби атындағы ҚазҰУ-дың педагогика және білім берудегі менеджмент кафедрасының п.ғ.к., қауымдастырылған профессоры Қ.Ш.Молдасан мен п.ғ.д., қауымдастырылған профессор А.А.Булатбаева жетекшілігімен «Педагогика және психология», «Педагогика. Білім берудегі менеджмент» мамандықтарының 1-курс докторанттары ұйымдастырды.

Тәрбие сағаты Алматы қаласындағы «Qalam» мектебінде өтті. Оған ҚазҰУ докторанттары мен осы ұйымның мұғалімдері белсене қатысты. Тәрбиелік іс-шараның мақсаты көшбасшылық пен ұйымшылдықтың маңызын түсінуге және бірлескен шешім қабылдаудың тиімді әдістерін меңгеруге бағытталды. 

Семинар-тренинг барысында қатысушылар көшбасшылық пен ұйымшылдықтың өзара байланысын, командада тиімді қарым-қатынас орнату әдістерін, сондай-ақ бірлескен шешім қабылдаудың заманауи тәсілдерін талқылады. 

Тренинг соңында мектеп директоры іс-шараның әр кезеңі жүйелі жоспарланып, қатысушылар үшін пайдалы әрі қызықты болғанын атап өтті. Сонымен бірге, осындай маңызды шараны ұйымдастырған докторанттарға жоғары жауапкершілік пен шығармашылық көзқарас үшін алғысын білдірді.