Студенттер ауған соғысы ардагерлерімен кездесті

Әл-Фараби атындағы Қазақ Ұлттық университеті Философия және саясаттану факультетінде Дінтану мамандығының 1 курс студенттеріне арналған «Сен халқыңның жүрегіндесің, жауынгер!» атты тәрбие сағаты өтті. Бұл іс-шара 15 ақпан – Ауған жерінен кеңес әскерлерінің шығарылған күніне орай ұйымдастырылған болатын. Тәрбие сағатының мақсаты – ауған соғысы ардагерлеріне құрмет көрсету, жат жерде көз жұмған жерлес азаматтарды еске алу және жастарға патриоттық тәрбие беру. Студенттермен арнайы кездесуге жалындаған жастық шағын оқ пен от арасында өткізіп, елге аман-сау оралып, туған жерімен қауышқан интернационалист-жауынгерлер «Абырой» Ауған соғысы ардагерлері одағының төрағасы Дауылбек Әли Нариманұлы және  Әлібаев Назар Бөлегенұлы келді. Жауынгерлерді қолдап Чернобыль ардагері Хашимов Дильшот Саметұлы, ҚР Қарулы Күштерінің запастағы полковнигі Конуров Арман Тілеутайұлы және Ибраимжанова Ғалия Ғабдулхаққызы  жауынгер-ардагерлер де болды.

Жиында Дінтану және мәдениеттану кафедрасының профессоры Қарлығаш Борбасова өзінің алғысөзін айтып, қазіргі таңда студенттер үшін Ауған соғысы ардагерлерінің естелік әңгімелерін тыңдау өнегелі тәрбие деп атап өтті.

Ауған соғысының ардагер жауынгерлері студенттерге туған елін сүюге, құрметтеуге баулитын тағлымды ақыл-кеңестерін айтты. Ардагерлер қазіргі таңдағы жастардың мемлекет алдындағы әскери міндеттерін атқарудан қашатынын өткір сынға алды. Студенттерге болашақ үшін негізгі қажет құндылық білім екенін атап өтіп, ата-аналарын, ұстаздарын және достарын сыйлауға шақырды.

Ұйымдастырғандар: Дінтану және мәдениеттану кафедрасының профессоры Қарлығаш Борбасова, Дінтану және теология мамандығының 1 курс PhD докторанты Эльмира Сұлтанбаева және 1 курс магистранты Нұрмади Ербол.