ҚазҰУ мен Алматы қаласы әкімдігі «Ғылым, бизнес және өндірістің интеграциясы» форумын өткізді

Әл-Фараби атындағы Қазақ ұлттық университетінде Алматы қаласы әкімдігімен бірлесіп ұйымдастырылған «Ғылым, бизнес және өндірістің интеграциясы» атты форум өтті. Мұндай форум алғаш рет ұйымдастырылды. Іс-шараға Алматы қаласының әкімі Ерболат Досаев, ҚазҰУ Басқарма Төрағасы – Ректор Жансейіт Түймебаев, экология, қоршаған ортаны қорғау және сейсмикалық қауіпсіздік саласындағы сарапшылар, инновациялық технологияларды өндіріске енгізіп отырған компаниялар, ғылыми қауымдастықтар, сондай-ақ бизнес өкілдері қатысты.

Форум алдында қатысушылар ҚазҰУ-дың инновациялық өнімдер мен жоғары технологиялық жобалар орталығы «Farabi Hub» жұмысымен танысты. Хабта Жерді қашықтықтан зондтау технологиялары бойынша Қазақ-Қытай зертханасы, Солтүстік-Батыс политехникалық университетінің филиалы, робототехника мен мехатроника RoboMech орталығы, технопарк зертханасы, дәрілік өсімдіктер орталығы, ZTE инновациялық орталығы, химия және химиялық технологиялар зертханасы, «сот сараптамасы» зертханасы орналасқан. Сондай-ақ химия, биология, физика салаларындағы инновациялар көрмесі және университет базасындағы суперкомпьютерлік кластер, ҚазҰУ құрылысының II кезеңі бойынша бас жоспар мен оқу орны қызметі туралы бейнефильм ұсынылды.

Алматы әкімі Ерболат Досаев пленарлық отырыста қаланың инфрақұрылымын дамыту, экология мен цифрландыру бойынша өзекті міндеттерді атап өтті. Ол мемлекет басшысының ғылым мен инновацияны дамыту саясатына ерекше көңіл бөліп отырғанын жеткізді. ҚазҰУ ректоры Жансейіт Түймебаев университеттің алдағы жоспарлары мен ғылымды коммерцияландыру арқылы Алматының инновациялық экожүйесіне интеграциялану мүмкіндіктерін атап көрсетті.