«Ғылым, бизнес және өндіріс ықпалдастығы» атты форум қатысушыларына Әл-Фараби атындағы Қазақ ұлттық университеті мен Қытайдың Солтүстік-батыс политехникалық университеті бірлесіп ғарышқа ұшыратын микроспутник туралы мәлімет берілді. Сонымен қатар ҚазҰУ базасында дайындалған наноспутниктердің макеті көрсетілді.
Қазіргі таңда оқу ордасының зерттеушілері Солтүстік-батыс политехникалық университетінің ғалымдарымен бірлесіп NKSAT микроспутнигін әзірлеу жұмыстарын жүргізуде. Бұл Қазақстан мен Орталық Азиядағы алғашқы университеттік микроспутник болмақ.
Ортақ жұмыс өз кезегінде ғарышты зерттеуге, білікті мамандарды даярлауға және ортақ спутниктерді әзірлеуге жол ашады. Сонымен қатар микроспутник арқылы Жерді қашықтықтан зерттеу жұмыстарын жүргізуге мол мүмкіндік береді. Ғарышқа ұшырылатын микроспутник жердің гравитациялық өрісін және радиациялық сәулеленуді өлшеу, геологиялық барлау жүргізу бойынша негізгі үш міндетті орындайды.
Аталған жобаны іске асыру шеңберінде ҚазҰУ аумағында Хайнань спутниктік деректерді зерттеу және пайдалану орталығымен және СБПУ бірге жерүсті станциясын орнату жоспарлануда.
Айта кетейік, Қытайдың Солтүстік-батыс политехникалық университеті ғарышқа наноспутниктерді ұшыру бойынша көшбасшы болып табылады.
ҚазҰУ – ғарышқа наноспутниктерді ұшыру бойынша тәжірибесі бар еліміздің жалғыз жоғары оқу орны. Ғарыш айлағына университет ғалымдары әзірлеген «Al-Farabi-1» және «Al-Farabi-2» наноспутнигі 2017 және 2018 жылдары сәтті ұшырылып, өз миссиясын орындады.
Әл-Фараби атындағы ҚазҰУ-дың Баспасөз қызметі
Басқа жаңалықтар
