Физика-техникалық факультетінің Плазма физикасы, нанотехнология және компьютерлік физика кафедрасы оқытушыларының ұйымдастыруымен «Электр энергетикасы» ББ 2-курс студенттері арасында ҚР энергетикасының дамуына арналған «Қазақстан энергетикасының бүгіні мен ертеңі» атты маңызды іс-шара өтті.
Студенттер командаларға бөлініп, плакат, макеттер мен презентациялар дайындап, еліміздегі электр стансаларының өзекті мәселелерін баяндады. Қатысушылар Қазақстан бойынша түрлі электр стансаларының жұмысына тоқталып, олардың энергетикалық тиімділігін талдады. Сондай-ақ дәстүрлі электр стансаларымен қатар, жаңартылатын энергия көздері арқылы жұмыс істейтін күн және жел стансаларының да артықшылықтары мен кемшіліктерін талқылады. Дәстүрлі электр стансаларының артықшылықтары арасында олардың жоғары қуаты мен тұрақтылығын келтіріп, көміртегі диоксидінің жоғары шығарындылары мен экологияға берер теріс әсері секілді елеулі кемшіліктерін де атап көрсетті. Жаңартылатын энергия көздерінің климаттық шектеулері болса да, қоршаған ортаға минималды кері әсері мен энергияны пайдаланудағы шығындардың төмендеуі негізінде болашақта жасыл энергетиканың дамуына үлес қосатынына назар аударылды.
Бұл іс-шара студенттердің тұрақты даму принциптері мен энергетика саласының экологиялық аспектілерін ескере отырып, Қазақстанда атом электр стансасын салуға байланысты қоғамдық маңызын айқындады. Іс-шара студенттердің кәсіби білім алуда ой-өрісін кеңейтіп қана қоймай, ел энергетикасының дамуына үлес қосуда сапалы білімнің аса маңызды екенін айқындап берді. Осындай білім мен тәжірибеге сүйенген білім алушылар жалпыхалықтық референдумда дұрыс таңдау жасады деп ойлаймыз.
Шолпан ӘБДИЕВА,
Ақмарал КЕНЖЕБЕКОВА,
ФПН және КФ кафедрасының аға оқытушылары
Басқа жаңалықтар
