География және табиғатты пайдалану факультетінің докторанттары «Атырау мұнай өңдеу зауыты» ЖШС және «Доссормұнайгаз» мұнай-газ өндіру басқармасы базасында ғылыми-өндірістік практикадан өтіп, құнды тәжірибе жинақтады.
Осы сапар барысында докторанттар мұнай-газ өндірісіндегі қауіпсіздік стандарттарын зерттеу, геоақпараттық жүйелерді (ГАЖ) қолдану мүмкіндіктерін талдау, өндірістік апаттардың алдын алу стратегияларын қарастыру сияқты өзекті бағыттар бойынша зерттеу жұмыстарын жүргізді.
Мұнай-газ өнеркәсібі – әлемдік экономиканың маңызды салаларының бірі. Бұл салада экологиялық қауіпсіздікті қамтамасыз ету, өндірістік апаттардың алдын алу және технологиялық процестерді оңтайландыру мәселелері өзекті болып қала береді.
Бұл сапар докторанттар үшін ғылыми зерттеулеріне қажетті деректер жинауға және өндірістік процестерді тереңірек түсінуге мүмкіндік берді. Докторант Айдана Исатаеваның диссертация тақырыбының зерттеуі өндіріс орындарындағы қауіпсіздік стандарттары, еңбек жағдайларын бағалау және апаттардың алдын алу әдістеріне бағытталған. «Атырау мұнай өңдеу зауыты» ЖШС кәсіпорны докторантқа өнеркәсіптік қауіпсіздік құжаттары, апаттарды болдырмау стратегиялары және қауіптерді бағалау әдістері бойынша құнды материалдармен танысуға мүмкіндік берді. Сонымен қатар өндірістік процестерде қауіпсіздік стандарттарын сақтау мен жаңғырту шаралары көрсетілді.
Ал «Доссормұнайгаз» кәсіпорны докторант Нұрболат Қалманбайды мұнай өндіру саласындағы кәсіби тәуекелдер, өндірістік қауіпсіздік шаралары және экологиялық мониторинг бағыттары бойынша жұмыстарымен таныстырды. «Доссормұнайгаз» кәсіпорны докторантқа өндірістік процестерді ұйымдастыру, қауіпсіздік жүйелерін жетілдіру және қоршаған ортаға әсерді төмендету бойынша да бірқатар маңызды зерттеу материалдарын ұсынды.
Қазіргі таңда мұнай-газ саласындағы қауіп-қатерлерді бағалау және алдын алу үшін цифрлық технологиялар кеңінен қолданылуда. Докторанттар ғылыми жұмыстарында ГАЖ технологияларын қолдану арқылы экологиялық мониторинг пен өндірістік қауіпсіздікті бағалаудың жаңа әдістерін зерттеуде.
Бұл сапар докторанттардың ғылыми зерттеулеріне үлкен серпін беріп, оларды тәжірибемен ұштастыруға жол ашты. Болашақта ғылыми-зерттеу жұмыстарын одан әрі жетілдіру, жаңа технологияларды енгізу және қауіпсіздік стандарттарын жақсарту бағытында бірлескен жобалар жүзеге асырылады.
Біз өз тарапымыздан «Доссормұнайгаз» және «Атырау мұнай өңдеу зауыты» ЖШС басшылығы мен қызметкерлеріне нақты өндірістік жағдайда зерттеу жүргізуге мүмкіндік бергені үшін алғыс білдіреміз.
Әсима ҒАЛЫМЖАНҚЫЗЫ,
Картография және геоинформатика кафедрасының
профессоры
Басқа жаңалықтар
