2025 жыл – Шығыстың ұлы ойшылы Әбу Насыр әл-Фарабидің (870–950) туғанына 1155 жыл толатын мерейлі кезең.
Қазақстандағы фарабитану ғылымының жарты ғасырдан астам даму тарихындағы басты жетістік – ортағасырлық энциклопедист-ғалымның мол мұрасы қазақ халқының рухани мәдениет қазынасына еніп, елдің тарихы мен мәдениетінің ұлттық байлығы деңгейіне көтерілгені.
1993 жылы Әл-Фараби орталығын құру идеясының рухани бастамашысы және алғашқы жетекшісі –Шығыс философиясы тарихы мен әл-Фараби шығармашылығын зерттеуде әлемге танылған көрнекті қазақстандық ғалым, философия ғылымдарының докторы, профессор,ҚР ҰҒА корреспондент-мүшесі Ағын Хайроллаұлы Қасымжанов болды.
Бүгінгі таңда «Әл-Фараби орталығы» тарихи сабақтастықты сақтай отырып,соңғы отыз жыл ішінде қалыптасқан ғылыми дәстүрлерге сүйеніп, заманауи ғылыми әлемнің талаптарына сай Екінші Ұстаз - әл-Фарабидің ғылыми мұрасын зерттеу мен насихаттауды белсенді түрде жалғастырып келеді.
Әл-Фарабидің философиялық көзқарастарының энциклопедиялық тереңдігі мен әмбебаптығы жыл сайын өтетін Фараби форумы аясындағы халықаралық ғылыми пікірталастардың негізгі өзегіне айналған.
Ойшылдың ғылыми-философиялық мұрасын халықаралық деңгейде кеңінен тарату және ғылыми тәжірибе алмасу мақсатында әлемнің жетекші жоғары оқу орындарында (Түркия, Болгария, Сирия, Жапония) әл-Фараби орталықтарының желісі құрылды, сондай-ақ Стамбул мен Делиде әл-Фараби үйлері-музейлері ашылды.
Орталықтың al-farabi.kaznu.kz сайты – ортағасырлық философ әрі энциклопедист ғалымға арналған онлайн-дискуссиялық, білім беру және ақпараттық алаң. Бұл платформа фарабитанушы ғалымдар мен докторанттар, магистранттар, студенттер, сондай-ақ ұлы ойшылдың мұрасымен танысқысы келетін барша зерттеушілер үшін ашық.
Орталықтың қызметі әл-Фараби атындағы ҚазҰУ ғылыми кітапханасы ғимаратындағы әл-Фараби музейінің жұмысымен тығыз байланысты.
Музейдің тұжырымдамалық негізінде ғалым және философ әл-Фарабидің
адамзаттың үйлесімділігі мен бақыты жолындағы өмірлік ізденістеріне негізделген құндылықтар жүйесі жатыр.
Музей экспозициясы келесі тақырыптық бөлімдерден тұрады:
«Көне Отырар – Естелік қазынасы. Әл-Фарабидің жастық шағы»; «Ұлы Жібек жолымен. Даналыққа, дүниетанымға ұмтылған жылдар. Таяу Шығыс елдеріндегі білім алу кезеңі»; «Әл-Фараби. Шығыс пен Батыс диалогы»; «Әл-Фарабидің еңбектері – адамзаттың алтын мұрасы. Әл-Фараби және түркі дүниесінің ойшылдары»; «Әл-Фарабидің рухани мұрасы және қазіргі Қазақстан».
.jpeg)