ҚазҰУ қалашығындағы мереке. ҚР Тәуелсіздігінің 25 жылдығы және Алматы қаласының 1000 жылдық мерейтойлары қарсаңында әл-Фараби атындағы Қазақ ұлттық университетінде жыл сайынғы дәстүр бойынша әз-Наурыз мейрамын атап өтті. Бір айта кетерлігі, ұлттық университет соңғы 5 жыл көлемінде бұл айтулы мерекені ҚР Сыртқы істер министрлігі және оңтүстік астананың елшілік бөлімдерімен бірге тойлап келеді. Сонымен қатар Қытай, АҚШ, Түркия, Иран, Испания, Франция, ГФР, Корея, Үндістан және т.б. мемлекеттер елшіліктерінің басшылары, БҰҰ, ЭСКАТО, АӨЫСШК ұйымдарының өкілдері келді. Мерекелік шараға, сондай-ақ оқытушы-профессорлар құрамы, студенттер, шетелдік қонақтар қатысты. Мереке аясында шетелдік меймандар ҚазҰУ-дың жаңа инфрақұрылымдық нысандарымен, соның ішінде «Керемет» студенттерге қызмет көрсету орталығымен танысты. Қытай елінің Қазақстандағы бас консулы Чжан Вей атап өткендей, мұндай орталықтың болуы көптеген әлемдік жоғары оқу орындарына үлгі болып табылады. Шетелдік қонақтарға ҚазҰУ қалашығында жаңадан бой көтеріп, қолданысқа берілгелі отырған 25 метрлік жүзу бассейні таныстырылды. Тұрғызылған ғимарат құрылысы мемлекеттік жекеменшік әріптестік негізінде іске асырылған. Жуық арада бұл бассейн қызметін университет студенттері ғана емес, қала тұрғындары да пайдалана алады. Таныстыру рәсімінен кейін мерекелік шаралар бастау алды. Арнайы тігілген 25 киіз үйде ақ дастарқан жайылды. Мерекелік шараны ҚазҰУ ректоры Ғалымқайыр Мұтанов ашты. «Бүгінде Наурыз – ұлтымыздың осы күнге дейін жеткен сындарлы жетістіктері, қуанышты жеңістерімен үндескен мереке. Достық пен келісім, сенім мен түсіністік басты ұстанымы болған қазақ елін көркейткен Елбасымыздың еңбегінің арқасында жаңа жылды жаңа жетістіктермен, жарқын болашаққа деген сеніммен қарсы алып отырмыз» деді Ғ.Мұтанов. Елшілік бөлімдердің атынан сөз алған Қазақстандағы АҚШ-тың Бас консулы Марк Муди өз лебізін мемлекеттік тілде құттықтады. Жиын барысы одан әрі университет студенттері мен көркемөнерпаздар үйірмелерінің мүшелері дайындаған «Наурыз – Нұрлы жол» атты мерекелік концертпен жалғасын тапты. Өнерпаздар атынан аталмыш мейрамды әспеттейтін «Бәйтерек», «Самұрық», «Күн», «Жақсылық пен жамандық», «Жердің оянуы», «Жеті дәннің туылуы», «Жібек жолы», «Алматыға 1000 жыл» атты музыкалық-театрландырылған қойылымдары қойылды. Университет басшылығы мен мейрамның құрметті қонақтары бірігіп, еліміз бен өзге мемлекеттер арасындағы достық қарым-қатынас ұлғая берсін деген ниетпен қалашықтағы «Бейбітшілік бағына» ағаш көшеттерін отырғызды. Айтуған Дәулет
Басқа жаңалықтар
