Қытайтану ғылымын дамытудағы елеулі қадам

          2016 жылдың 30 сәуір күні Қытайтану кафедрасының ұйымдастыруымен екінші жыл қатарынан өтіп отырған «Қытайтану негіздері» жас қытайтанушылар мен оқытушылар қауымына, және магистранттар мен докторанттардың қытайтану саласындағы білімін жетілдіруге бағытталған екі апталық біліктілікті арттыру курсы өз жұмысын аяқтады.

         Курс барысында қытайтану кафедрасының белгілі қытайтанушы ғалымдарымен қатар, Сүлейменов атындағы Шығыстану институты секілді ғылыми-зерттеу орталықтарының да ғылыми қызметкерлері дәріс оқып, өз білімімен, осы салада болып жатқан соңғы ғылыми жаңалықтармен бөлісті.     Тыңдаушылар алдында кафедра ұстаздары Н. Мұқаметханұлы, Н.Ә. Алдабек, С.Ж. Сапанов, А. Серікқалиева, Г.Ахметбек, сондай-ақ, Шығыстану институтының ғалымдары Ошан Жанымхан, Л.Г.Ерекешевалар Қытай елінің тарихы мен мәдениеті, Қытайдың сыртқы саясаты, оның ішінде Қазақстан мен Орта Азия елдерімен арадағы дипломатиялық байланыстары жайында лекция оқыды.

          Курс соңында тыңдаушыларға салтанатты жағдайда сертификаттар табыс етілді, тыңдаушылар өз кезегінде бір ауыздан курс жұмысын ұйымдастырушыларға табыс тілеп, жыл сайын дәстүрлі түрде өз жалғасын табатынына сенім білдірді.

Қытайтану кафедрасы