Өнегелі жолы жастарға үлгі ұстаз
Педагогика мен білім беру кеңістігінде елдік мүддеге қызмет ету – үлкен жауапкершілік, ал сол жауапкершілікті ғылыми тереңдік, ұйымдастырушылық шеберлікпен үйлестіре білу – сирек қасиет. Осындай биік талаптың үдесінен шығып келе жатқан, ұжым құрметіне бөленген білікті басшы, ғалым, ұстаздың бірі – Педагогика және білім беру менеджменті кафедрасының меңгерушісі, педагогика ғылымының кандидаты, профессор Нұрсұлу Әлқожаева.
Ғалымның еңбек жолы – білім мен ғылымның, теория мен тәжірибенің табиғи сабақтастығын дәлелдейтін мазмұнды жол. Кафедра меңгерушісі ретінде ол оқу-әдістемелік жұмысты жүйелеуге, білім беру сапасын арттыруға, кафедра ұжымының ғылыми әлеуетін нығайтуға бағытталған нақты бастамаларымен ерекшеленеді. Ұжымдық келісім мен ортақ мақсатқа ұйыстыра білетін басқарушылық мәдениеті оның кәсіби болмысының айқын қырына айналған.
Нұрсұлу Сейткерімқызының ғылыми ізденісі ұлттық руханият пен педагогикалық ой тарихының маңызды арналарына бастайды. Оның зерттеулері жас ұрпақ тәрбиесіндегі құндылық ұстанымын айқындауға, ұлттық тәрбиенің мазмұнын байытуға қызмет етеді. Ғылыми еңбектеріндегі тұжырымдар білім берудің мәнін тек оқытумен шектемей, тұлғаның рухани кемелденуімен сабақтастыра қарастыратын кең өрісті көзқарасты танытады.
Ғалымның білім саласына сіңірген еңбегі мемлекет және қоғам тарапынан жоғары бағаланған. Мәселен, «Ы.Алтынсарин» төсбелгісі, «Білім беру саласының үздігі», Халық Қаһарманы, генерал Сағадат Нұрмағамбетов атындағы мерейтойлық медалімен, «Білім беру ісінің құрметті қызметкері» төсбелгісімен, сондай-ақ «Қаныш Сәтбаевтың 125 жылдық мерейтойы» медалімен марапатталуы, бұдан бөлек, ҚР ғылым және жоғары білім министрінің және ректордың алғыс хаттары – оның кәсіби еңбегіне берілген лайықты баға.
Нұрсұлу Сейткерімқызының ұстаздық болмысы – шәкіртке талап қоя отырып, қолдау көрсете білетін, ғылыми бағыт беріп, кәсіби сенім қалыптастыратын тәлімгерлік үлгі. Бүгінгі білім беру ісінде кәсіби біліктілікпен қатар, адами қасиет, рухани биіктік айрықша мәнге ие. Осы тұрғыдан алғанда, Нұрсұлу Сейткерімқызының өнегелі жолы жас мамандарға да, әріптестерге де үлгі екені хақ.
Ол нағыз ұстазға тән парасаттылық пен терең білімнің иесі. Көпжылдық тәжірибесі мен ізденіске деген шынайы ықыласы бізге қашанда үлгі деп қабылдаймыз. Ғылыми жетекші, білікті маман ретінде оның ғылыми этикаға деген адалдығы мен шәкірттеріне деген жауапкершілігі әрбір жас ғалымға қажет қасиет деп білемін. Нұрсұлу Сейткерімқызына шығармашылық шабыт пен ғылыми ізденістеріне толағай табыс тілейміз.
Қырмызы ЖҰМАБЕКОВА,
Педагогика және білім беру менеджменті кафедрасының аға оқытушысы, PhD
