ҚазҰУ-да 2016-2017 оқу жылына талапкерлердің құжаттарын қабылдау жұмысы басталды.
Қабылдау комиссиясы жұмысының салтанатты ашылу рәсіміне университеттің бірінші проректоры Мұхамбетқали Бүркітбаев қатысып, оқуға түсушілерге сәттілік тіледі.
Алғашқы күннен бастап ҚазҰУ-ға мамандықтар туралы ақпарат алуға, мамандармен кеңесіп, құжат тапсыруға келгендердің қарасы қалың. Жамбыл облысынан келген Адель Тәжиева қабылдау комиссиясына құжат тапсырған алғашқы талапкер атанып, естелік сыйлықтарға ие болды. «Мен журналист боламын деген нық сеніммен келдім. Сондықтан көп ойланбастан құжаттарымды ҚазҰУ-ға алғашқы күні тапсыруға бел будым. Енді шығармашылық емтиханға дайындалатын боламын», – дейді талапкер.
Жалпы университетте 15 факультетте 82 мамандық бойынша құжат қабылдау басталды. Сондай-ақ магистратура бойынша 90, докторантураға 69 мамандық бойынша өтініштер қабылданатын болады. Атап өтерлігі, жаңа оқу жылында педагогикалық мамандықтарға қабылдау бойынша өзгерістер енгізілді. Аталмыш мамандықты таңдаған талапкерлер енді міндетті түрде қосымша шығармашылық емтихан тапсыратын болады. Бұл болашақ мамандық иесінің балалармен жұмыс істеу мүмкіндігін, психологиялық даярлығын, оқушылармен тіл табыса алатындығын және кәсіби жағынан жарамдылығын бағалауға мүмкіндік береді деп күтілуде.
Сонымен жаңа оқу жылына құжаттар қабылдау бойынша ҚазҰУ Қабылдау комиссиясының биылғы жұмыс кестесін назарларыңызға ұсынамыз.
Бакалавриат бойынша талапкердің кешенді тестілеуіне (ТКТ) қатысу үшін өтініш 2016 жылдың 20 маусымы мен 9 шілдесі аралығында, талапкердің қайта кешенді тестілеуіне қатысу үшін өтініш 2016 жылдың 1-8 тамыз аралығында, шартты түрде қабылданған студенттер үшін қосымша кешенді қайта тестілеуге өтініш 2017 жылдың 5-12 қаңтар аралығында қабылданады. Шығармашылық мамандықтарға өтініштерді қабылдау жоғары оқу орындарының қабылдау комиссиялары тарапынан 20 маусымнан бастап 1 шілдеге дейін, педагогикалық мамандықтарға арнайы емтихан тапсыруға өтініш 20 маусымнан бастап 4 шілдеге дейін жүргізіледі. Ақылы негіздегі білім алу үшін азаматтардың жазған өтініштерін қабылдау 20 маусымнан 26 тамызға дейін, техникалық және кәсіби, ортадан кейінгі білімі бар азаматтардың ақылы негізде қысқартылған мерзімде білім алулары үшін туыс мамандықтарға өтініштерін қабылдау 23 шілдеден 26 тамызға дейін жалғасады. Жоғары кәсіби білімі (жоғары білім) бар азаматтардың ақылы негізде қысқартылған мерзімде білім алулары үшін өтініштерін қабылдау 20 маусымнан 26 тамызға дейін, білім беру гранттарын беру жөніндегі байқауға өтініш қабылдау шілде айының 23-31 аралығында қабылданады.
Талапкердің кешенді тестілеу емтихандары 17-23 шілде аралығында, талапкердің қайта кешенді тестілеуі 19-24 тамыз аралығында, шартты түрде қабылданған студенттер үшін қосымша кешенді қайта тестілеу 20-24 қаңтар аралығында белгіленген. Шығармашылық емтихандар таңдалған жоғары оқу орындарының қабылдау комиссияларында 2-7 шілде аралығында, педагогикалық мамандықтарға арнайы емтихан 5-14 шілде аралығында, шетел азаматтары мен екінші жоғары оқу орнына түсуші жеке тұлғалар үшін ауызша әңгімелесу 28 маусым мен 20 тамыз аралығына өткізіледі.
Жоғары білім алуға ұмтылған жас талапкерлерге ақ жол тілейміз! Сапалы білім мен қайталанбас қызықты студенттік өмірді қалайтын болсаңыз, ҚазҰУ-ды таңдаңыз!
Елдана ТОҚБАЙ
Фото: Жүнісбеков Марат
Басқа жаңалықтар
