Әл-Фараби атындағы ҚазҰУ-да биоалуантүрлілік және өсімдік генетикалық ресурстарын сақтау бойынша халықаралық тәжірибе ұсынылды

2026 жылғы 15 қыркүйекте әл-Фараби атындағы Қазақ ұлттық университетінің География және табиғатты пайдалану факультетінде магистранттар, докторанттар және жас ғалымдарға арналған лидерлік дәріс өтті. Іс-шараның спикері – доктор Шовкат Ходжаев. Доктор Шовкат Ходжаев – Юлиус Кюн институтының (JKI), Мәдени өсімдіктер жөніндегі федералдық ғылыми-зерттеу институтының Жеміс дақылдарын селекциялық зерттеу институтының ғылыми қызметкері.

Дәріс барысында биоалуантүрлілікті сақтау, өсімдік генетикалық ресурстарын тиімді пайдалану, өсімдіктер селекциясы, аграрлық маркетинг және халықаралық сауда салаларындағы заманауи ғылыми зерттеулер мен халықаралық тәжірибе қарастырылды. Спикер аталған бағыттардың қазіргі даму үрдістеріне тоқталып, ғылыми зерттеулер мен халықаралық ынтымақтастықтың маңызын атап өтті.

Сонымен қатар ғылыми жобаларды жүзеге асыру барысында геоақпараттық жүйелерді қолдану және зерттеу әдістемесіне қатысты мәселелер талқыланды.

Кездесу магистранттар, докторанттар және жас зерттеушілер үшін халықаралық ғылыми тәжірибемен танысуға, кәсіби білімдерін кеңейтуге және ғылыми пікір алмасуға мүмкіндік берді. Дәріс соңында қатысушылар өздерін қызықтырған сұрақтарын қойып, спикермен пікір алмасты.

Дәріс әл-Фараби атындағы ҚазҰУ-дың Тұрақты даму бойынша ЮНЕСКО кафедрасының ғалымдары мен Германияның Юлиус Кюн институтының (JKI), Мәдени өсімдіктер жөніндегі федералдық ғылыми-зерттеу институтының Жеміс дақылдарын селекциялық зерттеу институты арасындағы бірлескен KLINU жобасы аясында ұйымдастырылды.

KLINU жобасы өсімдік генетикалық ресурстарын сақтау, биоалуантүрлілікті қорғау және климаттың өзгеруі жағдайында тұрақты әрі бейімделген дақылдарды дамыту бағыттарымен сабақтас. Бұл бағыттар БҰҰ-ның Тұрақты даму мақсаттарының 15-мақсаты – «Құрлық экожүйелерін сақтау», оның ішінде биоалуантүрлілікті сақтау және экожүйелерді қорғау міндеттерімен үндеседі.

Мұндай іс-шаралар университеттің халықаралық академиялық байланыстарын нығайтуға, білім алушылардың ғылыми әлеуетін дамытуға және биоалуантүрлілікті сақтау мен тұрақты даму салаларындағы халықаралық тәжірибе алмасуға ықпал етеді.

Әл-Фараби атындағы Қазақ ұлттық университеті білім, ғылым және халықаралық ынтымақтастықты дамытуға бағытталған осындай кездесулер арқылы жас ғалымдардың кәсіби қалыптасуына және ғылыми ізденістерінің кеңеюіне қолдау көрсетуді жалғастыруда.