- Басты бет
- ТДМ 15
- Кафедра күні аясында №17 Студенттер үйінде өткізілген «Студенттердің менталды денсаулығын қолдау және психологиялық әл-ауқатын нығайту» тақырыбындағы дөңгелек үстел
Кафедра күні аясында №17 Студенттер үйінде өткізілген «Студенттердің менталды денсаулығын қолдау және психологиялық әл-ауқатын нығайту» тақырыбындағы дөңгелек үстел
2026 жылғы 18 қарашада Әл-Фараби атындағы Қазақ ұлттық университеті Филология факультеті Түркітану және тіл теориясы кафедрасының «Кафедра күні» жоспарына сәйкес №17 Студенттер үйінде БҰҰ-ның 3-Тұрақты даму мақсаты – «Жақсы денсаулық және әл-ауқат» бағыты шеңберінде білім алушылардың менталды денсаулығын қолдау мақсатында кең көлемді дөңгелек үстел өткізілді.
Іс-шараның негізгі мақсаты – студент жастардың психологиялық-эмоционалдық тұрақтылығын арттыру, оқу үдерісіндегі күйзеліс пен шаршаудың алдын алу, жатақханадағы өмір сүру ортасында өзара қолдау мен жайлы психологиялық ахуал қалыптастыру, сондай-ақ салауатты өмір салты мен өзін-өзі реттеу дағдыларын насихаттау болып табылады.
Дөңгелек үстел барысында оқытушылар мен студенттер менталды денсаулықтың тұлғалық даму мен академиялық жетістіктерге тигізетін ықпалын жан-жақты талқылады. Атап айтқанда, эмоциялық күйіп кетудің алдын алу жолдары, уақытты тиімді басқару (тайм-менеджмент), жаңа ортаға бейімделу, сондай-ақ қиын жағдайларда психологиялық көмекке жүгіну мәдениеті туралы мазмұнды әңгіме өрбіді. Қатысушылар өздерін толғандырған сауалдарын ортаға салып, күнделікті күйзелісті еңсерудің тиімді тәсілдерімен және жеке тәжірибелерімен бөлісті.
Ашық, сенімді әрі еркін диалог форматында өткен бұл кездесу студенттердің ішкі ресурстарын нығайтуға, олардың ұжымдық бірлігі мен өзара түсіністігін арттыруға және университет қабырғасындағы қолайлы әлеуметтік-психологиялық ортаны дамытуға зор ықпал етті.
Ұйымдастырушылар: Түркітану және тіл теориясы кафедрасының оқытушысы А.Қ. Ақжігітова, Түркітану және тіл теориясы кафедрасының оқытушысы және куратор-эдвайзері Г.А. Марат.
Басқа жаңалықтар