Әбдіжәміл Нұрпейісовтың 95 жылдығына арналған шығармашылық кездесу
2019 жылдың 18 қазанында әл-Фараби атындағы ҚазҰУ-да белгілі жазушы Әбдіжәміл Нұрпейісовтың 95 жылдығына арналған шығармашылық кездесу өтеді.
Нұрпейісов Әбдіжәміл Кәрімұлы – 1924 жылы 22 қазанда Қызылорда облысы Арал ауданының Құланды ауылында балықшы отбасында дүниеге келген. 1942 жылы орта мектепті бітіріп, бірден қызыл әскер қатарына шақырылды, Прибалтиканы босату ұрыстарына қатысты.
Ол өзі қатысқан Курляндиядағы жау әскерлерін қоршау операциясын сипаттайтын алғашқы ірі шығармасын жазуды 1947 жылдың қаңтарында бастады. «Курляндия» деп аталған роман 1950 жылы Жамбыл атындағы ҚазССР Мемлекеттік сыйлығына ие болды. Сол жылы ол Мәскеудегі Горький атындағы Әдебиет институтына түседі. Оқуды аяқтағаннан кейін, 1962-1964 жылдары аралығында «Жұлдыз» журналының бас редакторы, Қазақстан Жазушылар одағының кеңесшісі болып жұмыс жасады.
Оның «Қан мен тер» трилогиясы кеңінен мойындалып, танымал болды. 1974 жылы роман КСРО Мемлекеттік сыйлығына ие болып, аттас көркем фильм түсіріліп, пьесалар қойылды. Ол аударма қызметіне көп уақыт арнады. Орыс әдебиеті классиктерінің және көптеген шетел жазушыларының шығармаларын қазақ тіліне аударды. А.К. Нұрпейісовтің жауынгерлік еңбегі мен шығармашылығы жоғары мемлекеттік наградалармен марапатталды. Оның еңбектері француз, неміс, испан және басқа тілдерге аударылған. Жазушы халықаралық қазақ PEN-клубының негізін қалап, 20 жылдан астам оның президенті болды.
Шараға шығармашылық зиялы қауым, қоғам және масс-медиа өкілдері, ҚазҰУ басшылығы, оқытушылары мен студенттері қатысады.
Өтетін орны мен уақыты: Ө. Жолдасбеков атындағы Студенттер сарайы, басталуы сағат16.00.
Әл-Фараби атындағы ҚазҰУ баспасөз қызметі
8 (727) 377 31 48
8 (727) 377 31 48
Басқа жаңалықтар
