ҚазҰУ-да Сидней олимпиадасының чемпионы Ермахан Ибраимовпен «Тәуелсіз елдің арланы» атты кездесу кеші өтті

ҚазҰУ-да журналистика факультетінің үлкен залында «Сұңқар» студенттер кәсіподағының «Ең үздік студенттік топ» жобасы аясында Сидней олимпиадасының чемпионы Ермахан Ибраимовпен «Тәуелсіз елдің арланы» атты кездесу кеші өтті.

Ермахан Сағиұлымен болған жылы жүздесуде студент жастар өздерінің тарапынан арнайы шығармашылық концерттік бағдарламамен бастады. Мың бұралып би билеп, әсем әнмен жүрек тербетті. Көңілдерге көктемдей нәзік сезім оратты. Әсіресе, Ермахан ағаның ақжарқын көңілі мен ақмаржан күлкісі, ақ тілегі студенттерге ерекше серпін берді.

Ермахан Ибраимов кездесу барысында: «Құрметті ҚазҰУ-лықтар! Мерейтой құтты болсын! Мен 1979 жылы ең алғаш мектеп табалдырығын аттадым. Мектеп жасынан спортқа деген ынтам жоғары болды. Мәселен, футбол десе, жақсы футболшы болатынмын, волейбол ойнау керек болса, жақсы волейболшы, жүгіру болса, бірінші жүгіремін. Басқа балаларға қарағанда спортты ерекше бағаладым. Осыны байқfған ұстаздарым мені, Алматыдағы арнайы Қажымұхан Мұңайтпасов атындағы олимпиадалық даярлау орталығына жіберген болатын. Ал, соны бітіргеннен кейін, 1991 жылы әл-Фараби атындағы Қазақ ұлттық университеті, заң факультетіне оқуға түстім. Осы алтын ұяда оқып жүріп, олимпиада чемпионы болдым, олипиаданың қола жүлдегері атандым. Бұл университеттің маған бергені өте көп болды.

Мен Серік Қонақбаев ағама еліктеп спортқа қарай табан тіредім. Сол арман оты менің жүрегімді жаулап, сол мені бокс залына алып келді. Сондықтан, бәлкім бізден кейінгі балалар «Ермахан ағама ұқсасам», - деп бокс залына келуі мүмкін. Әрқайсысыңыздың өз кумирлеріңіз бар, кейде сол кумирге ұқсасақ деген жалын оты үлкен биіктерге жетелейді. Мен сондай жолмен жеткен жанмын. Жастар, сіздердің болашақтарыңыз алда. Сондықтан да, Қазақстанға қандай еңбек істей аламыз, Қазақстанның көркеюіне не жасай аламыз соны ойланыңыздар. Ол сіздердің қолдарыңыздан келеді. Себебі, сіздер Қазақстандағы ең мықты университетте оқып жатырсыздар», - деп студенттер сұрақтарына салмақты жауап беріп, олардың спортқа, салауатты дене мәдениетіне деген ынталарын арттыра түсті.

Кездесуді ұйымшылдықпен өткізген «Сұңқар» студенттер кәсіподағы Ермахан Ибраимовқа ерекше ілтипат көрсетіп, сый-сияпат жасады.