АРТ-орталықтың жастары «І ХАЛЫҚАРАЛЫҚ ТҮРКІ ДҮНИЕСІ ЖАСТАРЫ» форумында

19-22.11.2024 жылдың аралығында Әл-Фараби атындағы кітапханада «І ХАЛЫҚАРАЛЫҚ ТҮРКІ ДҮНИЕСІ ЖАСТАРЫ» форумы өтті.

ТҮРКСОЙ халықаралық ұйымы мен ҚазҰУ бірлесіп ұйымдастырған ауқымды шараға АҚШ, Германия, Швейцария, Нидерланды, Түркия, Румыния, Қырғызстан, Өзбекстан, Болгария, Әзірбайжан – барлығы 25 мемлекеттен 200-ге жуық жастар жиналды.  Шара барысында өзге ұлт өкілдерінің мәдениеті мен ұлттық тағамдарына арналған «ТҮРКСОЙ» көрмесі ұйымдастырылды.

Жастар форумы түбі бір түркі әлемі жастарының басын қосуға үлкен мүмкіндік берді. Мұндағы мақсат – түркітілдес халықтар арасындағы бауырластық, достық қарым-қатынасты арттырып, мәдени, тарихи, ғылыми ынтымақтастықты дамыту.

Форум аясында журналистика факультетінде «ТҮРКСОЙ» медиа білім беру және зерттеу орталығы ашылды.

Үш күнге жоспарланған шара барысында түркі дүниесі жастарына арналған іс-шараларға АРТ-орталығының студенттері де қатысты: ұлттық бұрышта қазақ ұлттық киімдерімен қарсы алып, кітапхана фойесінде «Фараби сазы» ұлт-аспатар оркестрі өнер көрсетіп, гала кеште «Бахыт» шоу балеті, вокал үйірмесінің таланттары, этно ансамбль мүшелері жоғары деңгейде концерт ұйымдастырды.