Жастарға жемқорлыққа қарсы мәдениет түсіндірілді
Әл-Фараби атындағы ҚазҰУ-да сыбайлас жемқорлықтың деңгейін төмендетуге және комплаенс қызметінің жұмысын жетілдіруге бағытталған кезекті дәріс өтті.
Іс-шараға Алматы қаласы бойынша Сыбайлас жемқорлыққа қарсы іс-қимыл департаменті Превенция басқармасының басшысы Қанат Сәлімбаев, университет басшылығы, оқытушы-профессорлар мен студенттер қатысты.
Кездесуде сөз алған спикер Қанат Әсембайұлы: «Бүгінгі шараның мақсаты – жастар арасында сыбайлас жемқорлыққа қарсы мәдениетті қалыптастыру. «Тәрбиесіз берілген білім – адамзаттың қас жауы», – деп әл-Фараби бабамыз айтып кеткендей, адалдық, парасаттылық, әділдік сияқты негізгі құндылықтарды өскелең ұрпаққа насихаттау», – деп атап өтті.
Сондай-ақ агенттік өкілі студенттерге сыбайлас жемқорлыққа қарсы күрес пен оған қарсы іс-қимылдың халықаралық тәжірибесін жан-жақты айтып, парақорлықтан келер қауіп деңгейін жан-жақты түсіндірді. Интерактивті пікірталас түрінде өткен дәрісте студенттер университеттердегі ашықтық пен әділдік мәдениетін дамыту жөнінде өз ұсыныстарын ортаға салды.
Жиын соңында қатысушылар сыбайлас жемқорлыққа қарсы күресте белсенділік танытуға, қоғамда адалдық пен әділдік қағидаларын ұстануға шақырылды. Ұйымдастырушылар мұндай іс-шаралардың тұрақты түрде өтіп тұратынын және болашақта жастардың белсенділігі арта түсетініне сенім білдірді. Мұндай іс-шаралар студенттердің құқықтық санасын көтеруге және олардың әділдік жолында бірігуіне мүмкіндік береді.
Әл-Фараби атындағы ҚазҰУ-дың Баспасөз қызметі
