НАУРЫЗ МЕЙРАМЫ ҚҰТТЫ БОЛСЫН!Farabi University

НАУРЫЗ МЕЙРАМЫ ҚҰТТЫ БОЛСЫН!

21 наурыз, 2025

Құрметті Әл-Фараби атындағы Қазақ ұлттық университетінің
оқытушы-профессорлары, қызметкерлері мен білім алушы жастары!

 

Сіздерді Ұлыстың ұлы күні – Наурыз мерекесімен шын жүректен құттықтаймын!

Мемлекет басшысы Қасым-Жомарт Тоқаев Бурабайда өткен  Ұлттық құрылтайда: « Ұлыстың ұлы күні – ұлтымыздың ұлық мейрамы. Бұл – біздің ата дәстүріміз. Шуақты көктем мерекесінде бүкіл дүние қайта жаңғырады. Күн мен түн теңеледі. Қазақ елі әз-Наурызды көне заманнан бері тойлап келеді. Наурыз – ең алдымен, игілікті істердің мерекесі. Осы күндері әр үйде ақ дастархан жайылады. Ел-жұрт бір-бірімен қауышып, ақ тілегін айтады. Мұқтаж жандарға қайырымдылық жасап, қамқорлық көрсетеді. Ұлыстың ұлы күні биыл да қасиетті Ораза айымен тұспа-тұс келіп отыр. Еліміз үшін мұның мән-маңызы зор. Себебі біздің дініміз бен дәстүріміз – егіз. Қос қазынамыз халқымыздың бірегей болмысын айшықтай түседі», – деп атап өтті.

Осы игі бастама арқылы Наурыздың мәртебесі артып, мазмұны байып, мән-мағынасы тереңдей түсті.

Әл-Фараби атындағы Қазақ ұлттық университетінде дәстүрлі «Наурызнама» онкүндігі аясында ұлттық құндылықтарымыз бен салт-дәстүріміз кеңінен насихатталып, танымдық мәдени іс-шаралар іске асырылды.

Сан ғасырлық терең тарихы бар Наурыз мейрамы бүгінде ел бірлігі мен ынтымағының, тұрақтылық пен келісімнің жарқын символына айналды.

Жыл басы – жаңалық пен жақсылықтың жаршысы болып, халқымызды абыройлы биікке көтеріп, елімізді жаңа белестерге бастай берсін.

Ұлыстың ұлы күнінде сіздерге мықты денсаулық, отбасыларыңызға амандық, еңбектеріңізге табыс тілеймін!

 Әз Наурыз әр шаңыраққа құт-береке, ырыс пен молшылық әкелсін!

Құрметпен,

Әл-Фараби атындағы ҚазҰУ-дың Басқарма Төрағасы – Ректор

Жансейіт ТҮЙМЕБАЕВ