«Қиын өмірлік жағдайға тап болған аналарды қолдау: қоғам қалай көмектесе алады?» тақырыбындағы кураторлық сағат

2025 жылғы 28 наурызда «Аударма ісі» мамандығының 1-курс магистранттары А. Ермекқызы мен Д. Абканов педагогикалық практика аясында «Аударма ісі» мамандығының 3-курс студенттері үшін кураторлық сағат өткізді. Талқылау барысында қиын өмірлік жағдайға тап болған аналарды қолдау және қоғамның гендерлік теңдікті қамтамасыз етудегі рөлі мәселелері қозғалды.

Іс-шараның арнайы қонағы ретінде Алматы қаласындағы «Ана үйі» №1 үйлестірушісі Майра Омырзаққызы Тұрсынбаева қатысты. Сонымен қатар, кураторлық сағатты ұйымдастыруға және өткізуге Шетел филологиясы және аударма ісі кафедрасының аға оқытушылары Ә. Байелі және А. Алпыбаева атсалысты.

Талқылау барысында аналарды қолдаудың негізгі аспектілері, атап айтқанда, білім мен жұмысқа қолжетімділік, әлеуметтік көмек бағдарламалары, үкіметтік емес ұйымдар мен еріктілер қозғалысының рөлі, сондай-ақ психологиялық қолдау мәселелері қарастырылды. Гендерлік теңдік тұрақты даму мақсаттарының (ТДМ 5. Гендерлік теңдік) бірі ретінде ерекше назарға алынды, оның негізгі мақсаты – әйелдер мен ерлер үшін тең мүмкіндіктерді қамтамасыз ету, кемсітушілікті жою және осал жағдайдағы әйелдерді қолдау.

Майра Омырзаққызы қиын жағдайға тап болған әйелдермен жұмыс істеу тәжірибесімен бөлісіп, «Ана үйінің» қызметі мен аналарға арналған қолдау бағдарламалары туралы айтып берді.

Студенттер белсенді түрде пікірталасқа қатысып, өз ойларымен бөлісті және қиын жағдайға тап болған әйелдер кездесетін мәселелерді шешудің ықтимал жолдарын ұсынды. Отбасылық кеңес беру, икемді жұмысқа орналасу мүмкіндіктері және қолдау шаралары туралы ақпараттандыру мәселелері де көтерілді.

Іс-шара қазақ және орыс тілдерінде өткізілді, бұл студенттерге тақырыпты тереңірек түсінуге және тілдік құзыреттіліктерін дамытуға мүмкіндік берді.

Кураторлық сағат студенттерге аналарды қолдаудың маңыздылығын түсінуге және әр адам мен қоғам тұтастай алғанда олардың жағдайын жақсартуға қалай үлес қоса алатыны туралы ойлануға көмектесті.

Ұйымдастырушылар:

«Аударма ісі» мамандығының 1-курс магистранттары: А. Ермекқызы, Д. Абканов

Шетел филологиясы және аударма ісі кафедрасының аға оқытушылары: Ә. Байелі, А. Алпыбаева